ایف آئی اے امیگریشن نے کراچی ائرپورٹ پر ایک بڑی کارروائی کرتے ہوئے سمندر کے راستے شہریوں کو یورپ بھجوانے میں ملوث ایک منظم انسانی اسمگلنگ گینگ کو بے نقاب کر لیا۔ موریطانیہ سے کراچی پہنچنے والے پانچ مسافروں سے پوچھ گچھ کی جا رہی ہے، جن کی شناخت سمیع اللہ، داؤد اقبال، مرتضیٰ خان، شاہ ولی اور ارشد کے نام سے ہوئی ہے۔
سندھ کے سینئر وزیر شرجیل انعام میمن کی میڈیا سے گفتگو
مسافروں کا تعلق حافظ آباد، گجرانوالہ اور سوات سے ہے اور وہ فلائٹ نمبر TK 708 کے ذریعے موریطانیہ سے کراچی پہنچے۔ ایجنٹوں نے ان مسافروں سے 25 لاکھ سے 35 لاکھ روپے فی کس کے عوض یورپ پہنچانے کے معاملات طے کیے تھے۔ ابتدائی تفتیش کے مطابق، یہ مسافر دبئی، سعودی عرب، اور قطر کے راستے موریطانیہ پہنچے تھے، جہاں ایجنٹوں نے ان کو غیر قانونی طور پر یورپ پہنچانے کی کوشش کی۔
تاہم، مسافروں نے سمندر کے راستے غیر قانونی سفر کرنے سے انکار کیا اور واپس کراچی آ گئے۔ ایجنٹوں کا تعلق پنجاب کے مختلف علاقوں سے ہے، اور ان کے خلاف ایف آئی اے کی تحقیقات جاری ہیں۔
مسافروں کو ایجنٹوں کی نشاندہی کے لیے انسدادِ انسانی سمگلنگ سرکل کراچی منتقل کر دیا گیا ہے، جبکہ غیر قانونی سفری دستاویزات کی سخت جانچ پڑتال بھی جاری ہے۔ ایف آئی اے کراچی زون کے ڈائریکٹر نے کہا کہ ایجنٹوں اور ان کے سہولت کاروں کے خلاف بلا امتیاز کارروائیاں کی جا رہی ہیں اور انسانی اسمگلنگ میں ملوث نیٹ ورکس کے خلاف بڑے پیمانے پر کریک ڈاؤن جاری ہے۔
ایف آئی اے نے عوام کو آگاہ کیا ہے کہ ایجنٹوں کے جھانسے میں نہ آئیں اور بیرون ملک سفر کے لیے قانونی راستے اختیار کریں۔ اس کے علاوہ، اپنے ذاتی دستاویزات غیر متعلقہ افراد کے حوالے نہ کرنے کی ہدایت کی گئی ہے۔
