پاکستانی فاسٹ باؤلر حارث رؤف کی فٹنس کے حوالے سے بڑی خبر سامنے آئی ہے۔ ذرائع کے مطابق حارث رؤف کی طبیعت پہلے سے بہتر ہے، تاہم مینجمنٹ انہیں 12 فروری کو جنوبی افریقا کے خلاف کراچی میں ہونے والے میچ میں آرام دینے کا فیصلہ کر سکتی ہے۔ حارث رؤف کی ایم آر آئی رپورٹس کے بعد حتمی فیصلہ کیا جائے گا۔ واضح رہے کہ نیوزی لینڈ کے خلاف میچ میں حارث رؤف پسلیوں کی تکلیف کے باعث میدان سے باہر چلے گئے تھے۔
پاکستانی اوپنر صائم ایوب 10 ہفتوں کے لیے کرکٹ سے باہر ہوگئے ہیں۔ صائم ایوب جنوبی افریقا کے خلاف دوسرے ٹیسٹ میچ کے دوران انجری کا شکار ہوئے تھے اور علاج کے لیے انہیں لندن بھجوایا گیا ہے۔
دوسری جانب، بھارتی ٹیم کے نائب کپتان شبھمن گل نے ویرات کوہلی کی فٹنس کے حوالے سے کہا ہے کہ وہ انگلینڈ کے خلاف ون ڈے سیریز کے دوسرے میچ میں شامل ہو سکتے ہیں۔
نیوزی لینڈ کے فاسٹ باؤلر لوکی فرگوسن کی چیمپئنز ٹرافی میں شرکت مشکوک ہو گئی ہے۔ لوکی فرگوسن آئی ایل ٹی ٹی ٹورنامنٹ کے دوران انجری کا شکار ہوئے تھے۔
آسٹریلیا کی کرکٹ ٹیم کو بھی دھچکا لگا ہے، کیونکہ کپتان پیٹ کمنز اور فاسٹ باؤلر جوش ہیزل ووڈ چیمپئنز ٹرافی سے باہر ہوگئے ہیں۔ آسٹریلوی چیف سلیکٹر جارج بیلے نے اس بات کی تصدیق کی ہے کہ دونوں کھلاڑی اسکواڈ کا حصہ نہیں ہوں گے۔