کراچی: ایف آئی اے اینٹی ہیومن ٹریفکنگ سرکل کراچی نے جعلی دستاویزات کی تیاری اور فراڈ کے الزام میں ایک اہم کارروائی کی، جس میں مفرور ملزم کاشف امین کو گرفتار کر لیا گیا۔ ملزم پر الزام ہے کہ اس نے سال 2024 میں شہری کو امریکہ کے وزٹ ویزا کے حصول کے لیے جعلی کاغذات فراہم کیے تھے۔
کراچی: سی آئی اے نے اسٹریٹ کرائم میں ملوث ملزم کو گرفتار کر لیا
ملزم نے شہری کو امریکی کمپنی کی جعلی دستاویزات 3 لاکھ 50 ہزار روپے کے عوض فراہم کی تھیں اور اس کے ساتھ پاکستانی کمپنی میں ملازمت کی جعلی دستاویزات بھی تیار کی تھیں۔ امریکی قونصلیٹ کراچی نے جعلسازی کا انکشاف کیا اور اس کی بنیاد پر کارروائی کی گئی۔
ملزم گزشتہ سال سے مفرور تھا اور اس کا نام اسٹاپ لسٹ میں شامل تھا۔ وہ حال ہی میں کینیڈا سے کراچی پہنچا، جہاں امیگریشن کے دوران اس کے کوائف IBMS سسٹم میں ہٹ ہوئے، جس پر وہ گرفتار کر لیا گیا۔ ملزم کے خلاف مقدمہ درج کر کے تفتیش کا آغاز کر دیا گیا ہے۔
