ملک بھر کے تمام ائرپورٹس پر مسافروں کی سخت اسکریننگ کا عمل جاری ہے تاکہ انسانی اسمگلنگ اور جعلی سفری دستاویزات کے ذریعے غیر قانونی نقل و حرکت کو روکا جا سکے۔ اس سلسلے میں ایف آئی اے امیگریشن نے سیالکوٹ ائرپورٹ پر اہم کارروائی کرتے ہوئے انسانی اسمگلنگ میں ملوث ملزم کو گرفتار کر لیا ہے۔
گرفتار ملزم کی شناخت غلام حیدر کے نام سے ہوئی ہے، جو فلائٹ نمبر G9-552 کے ذریعے لیبیا سے پاکستان پہنچا تھا۔ ایف آئی اے حکام کے مطابق ملزم گزشتہ دو سال سے اینٹی ہیومن ٹریفکنگ سرکل کراچی کو مطلوب تھا، اور اس کے خلاف سال 2023 میں مقدمہ درج کیا گیا تھا۔
ابتدائی تفتیش کے دوران معلوم ہوا کہ ملزم نے بیرون ملک بھجوانے کے بہانے شہریوں سے لاکھوں روپے بٹورے تھے۔ گرفتار ملزم کو قانونی کارروائی کے لیے اینٹی ہیومن ٹریفکنگ سرکل کراچی کے حوالے کر دیا گیا ہے۔
ڈائریکٹر ایف آئی اے گوجرانوالہ زون نے کہا کہ سیالکوٹ ائرپورٹ پر مسافروں کی سخت اسکریننگ جاری ہے تاکہ جعلی سفری دستاویزات اور دھوکہ دہی کے ذریعے بیرون ملک جانے والے افراد کو روکا جا سکے۔ انہوں نے ہدایت کی کہ مشکوک سفری دستاویزات کی تفصیلی جانچ پڑتال کو یقینی بنایا جائے اور جعلی دستاویزات بنانے والے عناصر کے خلاف بھرپور کریک ڈاؤن کیا جائے۔
ڈائریکٹر نے مزید کہا کہ انسانی اسمگلنگ اور دھوکہ دہی کے ذریعے شہریوں کو بیرون ملک بھجوانے والے ملزمان اور ان کے سہولت کاروں سے آہنی ہاتھوں سے نمٹا جائے گا۔
شہریوں سے اپیل:
ایف آئی اے نے شہریوں سے اپیل کی ہے کہ وہ اپنی سفری دستاویزات غیر متعلقہ افراد کے حوالے کرنے سے گریز کریں اور ویزا حصول کے لیے ہمیشہ متعلقہ ملک کی ایمبیسی یا نامزد کردہ ویزا ایپلیکیشن سینٹر سے رابطہ کریں۔