پاکستان نیوی نے کمبائنڈ ٹاسک فورس 150 (CTF-150) کی کمانڈ ایک باوقار تقریب کے دوران بحرین میں رائل نیوزی لینڈ نیوی کے حوالے کر دی۔ تقریب میں کمبائنڈ میری ٹائم فورسز (CMF) کے کمانڈر وائس ایڈمرل جارج وکوف کی موجودگی میں پاک بحریہ کے کموڈور عاصم سہیل ملک نے کمانڈ باضابطہ طور پر رائل نیوزی لینڈ نیوی کے کموڈور راجر وارڈ کے سپرد کی۔
ڈسٹرکٹ ویسٹ پولیس کی کارروائی، سندھ بلڈنگ کنٹرول اتھارٹی کے جعلی ملازمین گرفتار
جولائی 2024 سے جنوری 2025 تک پاک بحریہ کی قیادت میں CTF-150 نے میری ٹائم سیکیورٹی کے مختلف کامیاب آپریشنز انجام دیے۔ ان آپریشنز کے دوران منشیات کی سمگلنگ کے خلاف تین بڑے کامیاب آپریشنز کیے گئے، جن میں تقریباً 10 ٹن منشیات ضبط کی گئیں، جن کی مالیت 50 ملین امریکی ڈالر سے زائد ہے۔
پاک بحریہ نے اپنی قیادت میں علاقائی تعاون کو فروغ دیا، جس میں کینیا اور عمان کی بحری افواج نے بھی حصہ لیا۔ اس کے علاوہ، کموڈور عاصم سہیل ملک نے ماریشس، کینیا، اور سری لنکا کے اہم سول اور فوجی رہنماؤں سے ملاقاتیں کیں اور مشترکہ میری ٹائم سیکیورٹی کے چیلنجز سے نمٹنے کے لیے تعاون پر زور دیا۔
اپنے دور کی اہمیت پر بات کرتے ہوئے، کموڈور عاصم سہیل ملک نے مشترکہ میری ٹائم سیکیورٹی کے لیے پاکستان کے عزم کو اجاگر کیا اور کہا کہ پاک بحریہ دنیا بھر کی بحری افواج کے ساتھ کام کرنے پر فخر محسوس کرتی ہے۔
نئے کمانڈر، کموڈور راجر وارڈ نے پاک بحریہ کی قیادت اور آپریشنل کامیابیوں پر شکریہ ادا کیا اور کمبائنڈ میری ٹائم فورسز کے تحت تعاون کو جاری رکھنے کی اہمیت پر زور دیا۔