بلاول بھٹو زرداری کا ن لیگ پر تنقید، "ان کی سیاست موٹروے سے شروع ہو کر میٹرو پر ختم ہو جاتی ہے”

رتو ڈیرو: (تشکر نیوز) پاکستان پیپلز پارٹی کے چیئرمین بلاول بھٹو زرداری نے ہفتے کے روز واٹر سپلائی سکیم کا افتتاح کیا۔ تقریب کے بعد میڈیا سے گفتگو کرتے ہوئے بلاول بھٹو نے حکمران جماعت مسلم لیگ نواز کو آڑے ہاتھوں لیا۔

اے این ایف اکیڈمی اسلام آباد میں آٹھویں اسسٹنٹ ڈائریکٹرز/انسپکٹرز بیسک کورس کی گریجویشن تقریب

انہوں نے کہا کہ ن لیگ کی سیاست محدود ہے جو موٹروے اور میٹرو منصوبوں تک ہی محدود ہو کر رہ گئی ہے۔ چیئرمین پی پی پی کا کہنا تھا کہ عوام کے مسائل پر توجہ دینا سیاستدانوں کی اولین ذمہ داری ہے۔ عوام معاشی مشکلات اور امن و امان کی خراب صورتحال سے پریشان ہیں اور ہماری طرف دیکھ رہے ہیں۔ ہم کم وسائل کے باوجود محنت کرکے مسائل حل کرنے کی کوشش کرتے ہیں۔

بلاول بھٹو نے مزید کہا کہ پیپلز پارٹی چاہے حکومت میں ہو یا اپوزیشن میں، وفاق کی جانب سے ہمیشہ ایک جیسا رویہ برداشت کرتی رہی ہے۔ انہوں نے کہا کہ حکومت سازی میں ہم نے معاہدے کے تحت ن لیگ کے وزیراعظم کو ووٹ دیا، لیکن حکمران جماعت کو یکطرفہ فیصلے کرنے سے گریز کرنا ہوگا۔

ان کا کہنا تھا کہ ن لیگ کے پاس دو تہائی اکثریت نہیں ہے، اس لیے کامیاب حکمرانی کے لیے تمام فیصلے اتفاق رائے سے کرنا ہوں گے۔ انہوں نے پاکستان تحریک انصاف پر بھی تنقید کی اور کہا کہ مغرب سے پاکستان کے اندرونی معاملات پر بیانات آ رہے ہیں جن پر تحریک انصاف کو وضاحت دینا ہوگی۔

بلاول بھٹو نے انٹرنیٹ کی سست رفتار پر طنز کرتے ہوئے کہا، "ہمیں انٹرنیٹ کو سست کرنے کے بجائے تیز کرنا تھا، یہ کون سی مچھلیاں ہیں جو صرف پاکستان کی کیبل کھاتی ہیں؟”