کراچی: صوبائی محتسب سندھ محمد سہیل راجپوت کی زیر صدارت مشیران اور کراچی کے ریجنل ڈائریکٹرز کے علیحدہ علیحدہ اجلاس منعقد ہوئے، جس میں مختلف اہم امور پر تفصیل سے گفتگو کی گئی۔ اجلاس میں زیر التواء کیسز، ضلعی دفاتر کی کارکردگی اور عوامی مفاد کے حوالے سے اہم فیصلے کیے گئے۔
ڈی جی رینجرز سندھ اور آئی جی سندھ کی زیر صدارت اجلاس: سیکیورٹی کو فول پروف بنانے کا فیصلہ
اجلاس میں کیے گئے اہم فیصلے:
زیر التواء کیسز کی فوری تحقیقات:
صوبائی محتسب نے ہدایت دی کہ 2024 سے قبل کی تمام زیر التواء شکایات کی تحقیقات فوری طور پر مکمل کی جائیں۔
عوامی مفاد میں شکایات کا حل:
شکایت کنندہ کی جانب سے شکایت واپس لینے یا غیر حاضری کے باوجود کیسز جاری رکھنے کا فیصلہ کیا گیا تاکہ عوام کو انصاف فراہم کیا جا سکے۔
ضلع ملیر میں صوبائی محتسب دفتر کا قیام:
عوام کی سہولت کے لیے ضلع ملیر میں صوبائی محتسب دفتر کے قیام پر رائے طلب کی گئی تاکہ لوگوں کو زیادہ سے زیادہ سہولت فراہم کی جا سکے۔
سرکاری محکموں میں فوکل پرسنز کی نامزدگی:
صوبائی محتسب نے سرکاری محکموں میں فوکل پرسنز کے نامزد نہ کیے جانے پر ناراضگی کا اظہار کیا اور اس بات کی ہدایت کی کہ فوری طور پر فوکل پرسنز کو نامزد کیا جائے۔
ریٹائرمنٹ اور پینشن کے کیسز:
صوبائی محتسب نے ریٹائرمنٹ اور پینشن کے کیسز کو فوری طور پر نمٹانے کی ہدایت دی تاکہ لوگوں کو ان کے حقوق کی فراہمی میں کوئی رکاوٹ نہ آئے۔
فوتی کوٹہ سے متعلق شکایات کا فوری حل:
فوتی کوٹہ سے متعلق تمام شکایات کو عدالتی اور صوبائی حکومت کے فیصلوں کی روشنی میں فوری طور پر نمٹانے کا فیصلہ کیا گیا۔
صوبائی محتسب سندھ کے ایکٹ میں ترامیم:
صوبائی محتسب نے مشیران اور ریجنل ڈائریکٹرز کو ہدایت کی کہ وہ صوبائی محتسب سندھ کے ایکٹ میں ترامیم سے متعلق تمام تجاویز فوری طور پر جمع کرائیں۔
محمد سہیل راجپوت کا پیغام:
صوبائی محتسب سندھ محمد سہیل راجپوت نے کہا کہ صوبائی محتسب کا دفتر انصاف فراہم کرنے والا ادارہ ہے اور عوام کو انصاف ملنا چاہیے۔ ان کا کہنا تھا کہ عوامی شکایات کا تیز اور مؤثر حل ادارے کی اولین ترجیح ہے۔