تشکر نیوز: کراچی: حکومت سندھ نے چیف انجنیئر ورکس اینڈ سروسز ایوب جونیجو کو ان کے عہدے سے ہٹا دیا۔ ایوب جونیجو چیف انجنیئر ہائی وے کے عہدے پر تعینات تھے اور ان کے پاس دو اضافی عہدوں کا بھی چارج تھا۔
پی ٹی اے کی جانب سے سوشل میڈیا صارفین کی تعداد کے اعداد و شمار جاری
ذرائع کے مطابق، ایوب جونیجو نے حالیہ دنوں سندھ کابینہ کو ایمرجنسی کا حوالہ دے کر 6 ارب روپے کے 8 سڑکوں کی منظوری حاصل کی تھی۔ یہ دعویٰ کیا گیا تھا کہ صوبے میں بارش، سیلاب یا کسی قدرتی آفت کی صورتحال ہے، حالانکہ ایسی کوئی ہنگامی حالت موجود نہیں تھی۔
تحقیقات میں بھاری فنڈز میں بے ضابطگیوں کی اطلاعات سامنے آئیں، جس کے بعد ایوب جونیجو کو ان کے عہدے سے برطرف کر دیا گیا۔ ان پر الزام ہے کہ انہوں نے فنڈز کا غلط استعمال کرتے ہوئے سندھ کابینہ کو گمراہ کیا۔
ایوب جونیجو کا ایک بااثر وزیر کے قریب ہونا بھی اس معاملے کو پیچیدہ بنا رہا تھا، لیکن معاملہ اعلیٰ سطح تک پہنچنے کے بعد انہیں برطرف کیا گیا۔ تاہم، ان کی برطرفی کے ساتھ مالی بے ضابطگیوں کا معاملہ بھی بظاہر بند کر دیا گیا۔