تشکر نیوز: کانجو کینٹ سوات: مالاکنڈ یونیورسٹی کی طالبات نے پاک فوج اور فرنٹیئر کور نارتھ کی جانب سے منعقدہ ایوینٹ میں ایک یادگار دن گزارا۔ اس ایوینٹ میں طالبات نے سیکیورٹی کے حوالے سے مختلف تربیتی مشقوں کا مشاہدہ کیا اور اس موقع پر کئی رنگا رنگ سرگرمیاں بھی منعقد کی گئیں۔
فرنٹیئر کور نارتھ کے بینڈ نے ملی نغموں کی دھنیں پیش کیں، جس کے ساتھ ساتھ محسود، بیٹنی، چترالی اور خٹک رقص بھی پیش کیے گئے۔ طالبات نے سیکیورٹی اور دفاعی سازوسامان کے سٹالز کو بڑی دلچسپی سے دیکھا اور اس کا بھرپور تاثر لیا۔
اس ایوینٹ میں کرکٹ، بیڈ منٹن اور ٹگ آف وار کے مقابلے بھی ہوئے، جہاں طالبات اور فرنٹیئر کور نارتھ کی ٹیموں نے حصہ لیا۔
تقریب کے اختتام پر کور کمانڈر پشاور، لیفٹیننٹ جنرل عمر احمد بخاری نے طالبات میں انعامات تقسیم کیے۔ اس موقع پر طالبات نے اس دن کے انعقاد پر پاک فوج اور فرنٹیئر کور نارتھ کا شکریہ ادا کیا اور کہا کہ وہ یہ دن کبھی نہیں بھولیں گی۔ انہوں نے مزید کہا کہ "آج ہمارا واپس جانے کو دل نہیں کر رہا، کور کمانڈر نے اس اہم دن کا انعقاد کر کے اپنا وعدہ پورا کیا۔”