سندھ بھر میں ایم ڈی کیٹ کے دوبارہ ٹیسٹ، امیدواروں کی بڑی تعداد میں شرکت

کراچی، (تشکر نیوز): عدالتی احکامات کی روشنی میں آج سندھ بھر میں میڈیکل اور ڈینٹل کالجز کے داخلہ ٹیسٹ (ایم ڈی کیٹ) دوبارہ منعقد کیے گئے۔ ٹیسٹ کے شفاف انعقاد کو یقینی بنانے کے لیے امتحانی مراکز کے اطراف دفعہ 144 نافذ رہی، جس کے تحت غیر متعلقہ افراد کی آمد و رفت اور ڈیجیٹل ڈیوائسز پر مکمل پابندی عائد کی گئی۔

اطالوی بحری جہاز امریگو وسپوچی کا کراچی کی بندرگاہ پر پرتپاک استقبال

ٹیسٹ کے اہم مراکز
ایم ڈی کیٹ ری ٹیسٹ کے لیے سندھ کے مختلف شہروں میں امتحانی مراکز قائم کیے گئے، جن میں کراچی، حیدرآباد، جامشورو، شہید بے نظیر آباد، لاڑکانہ، اور سکھر شامل ہیں۔ مجموعی طور پر 38 ہزار 683 امیدواروں نے شرکت کی، جن میں سے صرف کراچی میں 12 ہزار 849 امیدوار شریک ہوئے۔

خیبرپختونخوا میں پاک فوج کی بڑی کارروائی: 22 دہشتگرد ہلاک، 6 جوان شہید

کراچی کے مراکز میں ازدحام

کراچی میں ٹیسٹ کے لیے این ای ڈی یونیورسٹی اور کراچی یونیورسٹی میں بڑے پیمانے پر انتظامات کیے گئے۔ این ای ڈی میں 6 ہزار 400 اور جامعہ کراچی میں 6 ہزار 449 امیدوار امتحان دینے پہنچے۔ این ای ڈی کے اطراف، خاص طور پر مسکن چورنگی پر ٹریفک کا دباؤ زیادہ رہا، جس سے گاڑیوں کی لمبی قطاریں لگ گئیں۔

حیدرآباد، جامشورو، اور دیگر شہروں میں انتظامات

حیدرآباد پبلک اسکول میں 6 ہزار 406 امیدوار اور جامشورو میں 6 ہزار 254 امیدوار ٹیسٹ دے رہے ہیں۔ اسی طرح سکھر میں 5 ہزار 586 امیدوار اور لاڑکانہ میں 4 ہزار 802 امیدوار نے امتحان میں شرکت کی۔

شفافیت کے اقدامات

جامعہ این ای ڈی اور جامعہ کراچی میں ٹیسٹ کی نگرانی آئی بی اے کے وائس چانسلر ڈاکٹر آصف شیخ نے کی۔ انہوں نے میڈیا کے سامنے بند صندوقوں سے پرچہ نکالا اور واضح کیا کہ پرچہ مکمل سیل تھا اور کسی قسم کی بے قاعدگی نہیں ہوئی۔ پرچہ لانے کے لیے بند گاڑیوں کا استعمال کیا گیا، جن کی نگرانی سی سی ٹی وی کیمروں اور پولیس کے ذریعے کی گئی۔

دورانیہ اور سوالات
امتحان صبح ساڑھے 8 بجے شروع ہوا اور ساڑھے 3 گھنٹے پر محیط تھا، جس میں 200 کثیر انتخابی سوالات شامل تھے۔

دفعہ 144 کے تحت سختی
امتحانی مراکز کے اطراف میں دفعہ 144 نافذ رہی، جس کے تحت موبائل فون، لیڈیز پرس، اور دیگر اشیاء لانے کی اجازت نہیں تھی۔ یہ اقدامات امیدواروں کے لیے صاف اور شفاف ماحول فراہم کرنے کے لیے کیے گئے تھے۔