آئیڈیاز 2024 کا 12واں ایڈیشن 19 سے 22 نومبر تک کراچی ایکسپو سینٹر میں منعقد ہونے جا رہا ہے۔ یہ بین الاقوامی دفاعی نمائش ہر دو سال بعد منعقد ہوتی ہے، جس کا آخری ایڈیشن 2022 میں ہوا تھا۔
چار روزہ اس نمائش میں متعدد سرگرمیاں شامل ہوں گی، جن میں افتتاحی تقریب، دفاعی صنعتوں پر سیمینارز، اور اہم میٹنگز شامل ہیں۔ اس کے علاوہ کراچی کے ساحل سی ویو پر نشانِ پاکستان کے ساتھ ایک شاندار کراچی شو بھی منعقد کیا جائے گا۔
آئیڈیاز 2024 میں دنیا بھر کے نمائش کنندگان اپنی جدید دفاعی مصنوعات اور ساز و سامان پیش کریں گے، جس سے پاکستان کو اپنی دفاعی صنعت کو عالمی سطح پر اجاگر کرنے کا موقع ملے گا۔ یہ نمائش پاکستان کی اسٹریٹیجک پوزیشننگ اور دفاعی صلاحیتوں کو بین الاقوامی سطح پر نمایاں کرنے کا اہم ذریعہ ہے۔
پاکستان کے لیے یہ نمائش نہ صرف مقامی دفاعی مصنوعات کو عالمی مارکیٹ میں متعارف کرانے کا ایک بہترین پلیٹ فارم فراہم کرتی ہے، بلکہ بین الاقوامی پارٹنرز کے ساتھ تعاون کے مواقع بھی فراہم کرتی ہے۔
آئیڈیاز 2024 کے انعقاد سے پاکستان کی دفاعی برآمدات کو مزید فروغ ملے گا، جس سے ملکی معیشت مستحکم ہوگی۔ غیر ملکی وفود اور دفاعی ٹیکنالوجی فراہم کرنے والی کمپنیوں کے ساتھ نیٹ ورکنگ کے وسیع مواقع میسر آئیں گے، جو پاکستان کے دفاعی شعبے کی جدیدیت اور نئی شراکت داریوں کے قیام میں معاون ثابت ہوں گے۔
یہ نمائش دفاعی صنعت کے فروغ کے ساتھ ساتھ ٹیکنالوجی کی منتقلی اور مینوفیکچرنگ کے عمل کو بھی تیز کرنے میں کردار ادا کرتی ہے، اور یوں پاکستان کی مجموعی ترقی میں ایک اہم کردار ادا کرتی ہے۔ سن 2000 سے جاری کامیابیوں کی اس داستان میں آئیڈیاز 2024 ممکنہ طور پر شرکاء کی تعداد کے لحاظ سے پچھلے تمام ایڈیشنز کو پیچھے چھوڑنے کی توقع ہے۔