کراچی ( ): ہاکس بے کے قریب واقع انصاری گودام میں لگنے والی آگ کو ریسکیو 1122 سندھ، پاک نیوی اور کے ایم سی کے فائر برگیڈ کے اہلکاروں نے کامیابی سے بجھا لیا۔ ترجمان ریسکیو 1122 سندھ، حسان الحسیب کے مطابق، آگ گودام میں موجود سولر پینلز اور بیٹریوں کے باعث شدت اختیار کر گئی تھی۔
پریس ریلیز: ڈسٹرکٹ کورنگی پولیس کی چار ماہ کی کارکردگی
تفصیلات کے مطابق، سینٹرل کمانڈ اینڈ کنٹرول ریسکیو 1122 کو آگ لگنے کی اطلاع ملتے ہی فائر اینڈ ریسکیو ٹیمیں فائر بریگیڈ ٹرکوں کے ساتھ فوری روانہ ہو گئیں۔ ریسکیو 1122 سندھ کے علاوہ، پاکستان نیوی اور کے ایم سی کی 15 سے زائد فائر بریگیڈز نے مشترکہ طور پر کارروائی کرتے ہوئے آگ پر قابو پایا۔
آگ کی شدت مزید بڑھنے کی وجہ گودام میں موجود ایندھن، پرفیوم، اسپرے اور دیگر آتش گیر مواد تھا۔ ریسکیو 1122 اہلکاروں نے فوم کا استعمال کیا، جو ایندھن کی آگ بجھانے کے لیے مؤثر ثابت ہوا، جبکہ مزید فوم اور ضلعی انتظامیہ کی مدد بھی طلب کی گئی۔
ریسکیو 1122 کی جدید فائر مشینوں کا بھی استعمال کیا گیا تاکہ گودام کی چھت پر وینٹیلیشن ہول کے ذریعے دھوئیں کو باہر نکالا جا سکے اور آگ کو مزید پھیلنے سے روکا جا سکے۔ خوش قسمتی سے، آگ پر بروقت قابو پانے سے بڑے پیمانے پر نقصان سے بچا گیا۔
ترجمان ریسکیو 1122 نے مزید کہا کہ آگ پر مکمل قابو پا لیا گیا ہے اور تحقیقات جاری ہیں تاکہ آگ لگنے کی وجوہات کا پتہ چل سکے۔