تشکر نیوز: کراچی کے علاقے شاہ فیصل نمبر تین میں ایک غیر قانونی پیٹرول پمپ میں خوفناک آگ بھڑک اٹھی جس نے نیچے قائم پیٹرول پمپ اور اوپر موجود رہائشی عمارت کو اپنی لپیٹ میں لے لیا۔ ریسکیو حکام کے مطابق، آگ کی وجہ سے عمارت میں موجود افراد پھنس گئے، جنہیں نکالنے کی کوششیں جاری تھیں۔
شاہ فیصل نمبر تین کی عمارت میں آتشزدگی، ریسکیو 1122 کی بروقت کارروائی سے صورتحال کنٹرول میں
فائر بریگیڈ کی ایک گاڑی نے ابتدائی طور پر آگ بجھانے کا عمل شروع کیا، جبکہ مزید گاڑیوں کو طلب کرلیا گیا۔ فائر افسر نے بتایا کہ عمارت کے نچلے حصے میں لگی آگ پر قابو پا لیا گیا ہے اور عمارت میں پھنسے افراد کو چھت پر منتقل کیا گیا ہے۔ ایک شخص کو نیم بیہوشی کی حالت میں ریسکیو کیا گیا، جبکہ موقع پر پانچ فائر بریگیڈ کی گاڑیاں موجود تھیں۔
دکان کے باہر کھڑی متعدد موٹرسائیکلیں بھی جل گئیں اور دھویں کی شدت کی وجہ سے ریسکیو کارروائی میں مشکلات پیش آئیں۔ ایس ایس پی کورنگی توحید میمن نے کہا کہ آگ پر مکمل طور پر قابو پا لیا گیا ہے، تاہم افسوسناک طور پر ایک شخص جاں بحق ہوا۔ انہوں نے مزید بتایا کہ پمپ کے مالک کے پاس عدالت کے احکامات تھے، جس کی وجہ سے پولیس کارروائی نہیں کرسکتی تھی۔
ریسکیو ٹیم کے ترجمان کا کہنا تھا کہ کولنگ کے بعد آخری سرچ آپریشن کیا جائے گا تاکہ مکمل طور پر حالات قابو میں لائے جا سکیں۔