بلوچستان کے علاقے ضلع مستونگ میں کلی گلکنڈ میں مسلح افراد کی فائرنگ سے سراوان پریس کلب کے عہدیدار اور نیوز ایجنسی آن لائن سے وابستہ صحافی نثار احمد لہڑی جاں بحق ہوگئے۔
وی پی این استعمال کرنے والے صارفین انٹرنیٹ سروسز میں تعطل سے محفوظ رہے
سراوان پریس کلب کے عہدیدار و سینئر صحافی نثار احمد لہڑی آج صبح مستونگ شہر میں واقع اپنے زیر تعمیر مکان کی طرف جارہے تھے جس دوران انہیں نشانہ بنایا گیا، فائرنگ سے وہ موقع پر ہی جاں بحق ہوگئے، میت کو سول ہسپتال منتقل کردیا گیا جہاں ضروری کارروائی بعد میت ورثا کے حوالے کردی گئی۔
پولیس کی جانب سے ابتدائی قتل کی تصدیق کرتے ہوئے بتایا گیا کہ قتل کا واقعہ زمین کا تنازع ہے، ملزمان کی گرفتاری کے لیے پولیس چھاپے مار رہی ہے۔
ایس پی مستونگ عابد بازئی نے صحافیوں کو یقینی دہانی کروائی ہے کہ ملزمان کو جلد گرفتار کرلیا جائے گا۔
پریس کلب کی جانب سے واقعے کی مذمت کرتے ہوئے ملزمان کی گرفتاری اور صحافیوں کو تحفظ فراہم کرنے کا مطالبہ کیا گیا ہے۔