تشکر نیوز: وزیراعظم میاں محمد شہباز شریف نے سرکاری ملازمین کے سوشل میڈیا کے غیر ضروری استعمال اور ذاتی پروجیکشن پر پابندی عائد کر دی ہے۔ اس ضمن میں اسٹیبلشمنٹ ڈویژن نے ایک باقاعدہ نوٹیفکیشن جاری کیا ہے جو سوشل میڈیا ایڈوائزری کے تحت ہے۔
سندھ اسمبلی: بارش، منشیات، اور دھماکہ خیز مواد پر بحث
نوٹیفکیشن کے مطابق، کوئی بھی سرکاری ملازم بغیر حکومت کی واضح اجازت کے کسی بھی میڈیا پلیٹ فارم پر شرکت نہیں کر سکتا۔ اس کے علاوہ، سرکاری ملازمین کو سرکاری معلومات یا دستاویزات کے تبادلے سے بھی روکا گیا ہے۔
سوشل میڈیا ایڈوائزری کے تحت سرکاری ملازمین کو کسی بھی ایسے بیان سے بھی منع کیا گیا ہے جو حکومت کو شرمندہ کر سکتا ہو، چاہے وہ پریس میں ہو، عوامی بیان میں ہو، یا ٹیلی ویژن اور ریڈیو پروگرامز میں ہو۔
مزید برآں، سرکاری ملازمین کو نظریہ پاکستان یا حکومتی پالیسیوں کے خلاف کوئی بھی خیالات پیش کرنے کی ممانعت ہے، جن سے قومی سلامتی، غیر ملکی تعلقات، عوامی نظم و ضبط، شائستگی، اخلاقیات، توہین عدالت، ہتک عزت یا فرقہ وارانہ عقائد پر برا اثر پڑے۔
اسٹیبلشمنٹ ڈویژن کے نوٹیفکیشن میں یہ بھی کہا گیا ہے کہ سرکاری ملازمین سوشل میڈیا پلیٹ فارمز جیسے فیس بک، ٹویٹر، واٹس ایپ، انسٹاگرام، اور مائیکروبلاگنگ سائٹس پر اپنی رائے کا اظہار نہیں کر سکتے، اور وہ سیاسی جماعتوں کے ساتھ وابستگی یا پریس کانفرنسز اور میڈیا ٹاکس میں شرکت بھی نہیں کر سکتے۔