پاکستان کسٹمز جناح انٹرنیشنل ایئرپورٹ (JIAP) کراچی نے 2 کروڑ روپے مالیت کی ہیروئن اسمگل کرنے کی کوشش کو ناکام بنا دیا ہے۔ کلکٹر کسٹمز، جناب عدیم خان کو خفیہ اطلاع ملی تھی کہ کراچی سے ملائیشیا ہیروئن اسمگل کی جائے گی۔ اس پر کلکٹر نے ایڈیشنل کلکٹر ایئرپورٹ، فیصل خان کو فوری ہدایات جاری کیں۔
لیاری ندی پر غیر قانونی ہائیڈرنٹ منہدم، 20 افراد گرفتار
فیصل خان نے ڈپٹی کلکٹر حماد کو ہدایت دی کہ انٹرنیشنل ڈپارچر لاؤنج کے اندر اور باہر سادہ لباس میں اضافی نفری تعینات کی جائے اور پہلے سے موجود عملے کو الرٹ رکھا جائے۔
گزشتہ شام، انٹرنیشنل ڈپارچر لاؤنج میں تعینات عملے نے باتک ایئر کی پرواز OD 136 سے ملائیشیا جانے والے محمد عثمان نامی مسافر کو روکا۔ ابتدائی پوچھ گچھ کے دوران، مسافر نے کسی ممنوعہ شے کی موجودگی سے انکار کیا، لیکن غیر تسلی بخش جوابات اور جلدی نکلنے کی کوشش نے شک پیدا کیا۔
اسکیننگ کے دوران، مسافر کے سوٹ کیس کی تہہ میں مشکوک تصاویر ظاہر ہوئیں۔ تفصیلی جانچ کے بعد، کیس کی تہہ میں چھپائی گئی 2 کلو اعلیٰ معیار کی ہیروئن برآمد ہوئی، جس کی مالیت 2 کروڑ روپے بتائی گئی ہے۔ مسافر کو کسٹمز اور نارکوٹکس ایکٹ کے تحت گرفتار کر لیا گیا ہے اور عدالت سے ریمانڈ حاصل کرکے مزید تفتیش جاری ہے۔