تشکر نیوز: موسم گرما کی تعطیلات ختم ہونے سے قبل ہی کراچی میں نجی اسکولوں کی من مانیاں شروع ہو گئی ہیں۔ بیشتر نجی اسکولوں نے فیسوں میں غیر قانونی اضافہ کر دیا ہے، جس کے باعث معاشی تنگ دستی کا شکار والدین اپنے بچوں کو سرکاری اسکولوں میں داخل کرانے پر مجبور ہو گئے ہیں۔
کراچی کی سڑکوں کی تباہی: حالیہ بارشوں کے بعد لسبیلہ سے تین ہٹی جانے والی سڑک کھنڈرات میں تبدیل
ایڈیشنل ڈائریکٹر پرائیویٹ اسکولز سندھ، رفیعہ جاوید نے اس صورت حال پر تشویش کا اظہار کرتے ہوئے واضح کیا ہے کہ خلاف قانون فیسوں میں اضافہ برداشت نہیں کیا جائے گا۔ انہوں نے کہا کہ ایسے اسکولوں کی رجسٹریشن معطل کر دی جائے گی جو قانون کی خلاف ورزی کریں گے۔
رفیعہ جاوید نے تصدیق کی کہ ان کے پاس والدین کی جانب سے متعدد شکایات موصول ہوئی ہیں، جن میں کہا گیا ہے کہ اسکولوں نے فیسوں میں من مانا اضافہ کیا ہے۔ کراچی سمیت سندھ بھر میں کئی والدین معاشی مشکلات کی وجہ سے اپنے بچوں کو سرکاری اسکولوں میں داخل کرانے لگے ہیں، کیونکہ نجی اسکولوں کی فیسوں میں غیر قانونی اضافہ ان کی مالی حالت پر بوجھ ڈال رہا ہے۔
والدین کی مشکلات کے پیش نظر، متعلقہ حکام کو اس مسئلے کا فوری حل تلاش کرنے کی ضرورت ہے تاکہ تعلیمی اداروں کی من مانیاں ختم ہو سکیں اور بچوں کی تعلیم متاثر نہ ہو۔