تشکر نیوز: آئی ایم ایف اور پاکستان کے درمیان روپے اور ڈالر کی قدر کے تعین پر اختلافات پیدا ہوگئے ہیں۔
آئی ایم ایف نے اگلے مالی سال کے بجٹ کے لیے ڈالر کے مقابلے میں روپے کی قدر کو 16 فیصد کم کرکے 328.4 روپے مقرر کرنے کی تجویز دی تھی، تاہم پاکستان نے اس سے اختلاف کرتے ہوئے 3.5 فیصد کمی کے ساتھ روپے کی قدر 295 روپے مقرر کی ہے۔
یہ بات قابل ذکر ہے کہ ماضی میں بھی آئی ایم ایف کے تخمینے غلط ثابت ہوئے ہیں۔ آئی ایم ایف نے رواں ماہ جون کے لیے ڈالر کی قیمت 300 روپے تک پہنچنے کا اندازہ لگایا تھا، لیکن اس وقت ڈالر 278.10 روپے پر ٹریڈ کر رہا ہے۔
پاک بحریہ کے جہاز یرموک کی شمالی بحیرہ عرب میں کامیاب کارروائی، 380 کلوگرام منشیات برآمد
وزارت منصوبہ بندی کا کہنا ہے کہ بیرونی قرضوں کی ادائیگیوں کی وجہ سے اگلے مالی سال کے دوران روپے پر دباؤ برقرار رہے گا۔ حکومت کو اگلے مالی سال کے دوران 6 ارب ڈالر کے قرضوں کی ادائیگی کرنی ہے اور انہیں ورلڈ بینک سے 2.5 ارب ڈالر اور ایشیائی ترقیاتی بینک سے 1.6 سے 1.8 ارب ڈالر ملنے کی امید ہے۔
حکومت کا خیال ہے کہ ان قرضوں اور آئی ایم ایف پروگرام کی مدد سے روپے کی قدر کو قابو میں رکھا جاسکتا ہے۔ حکومت کے لیے دفاعی بجٹ، غیر ملکی قرضوں کی ادائیگی، بیرون ملک پاکستانی مشن چلانے کی لاگت اور پبلک سیکٹر ڈیولپمنٹ پروگرام کے اخراجات کے لیے حکومت کا مقرر کردہ ریٹ بہت اہم ہے۔
حکومت کو توقع ہے کہ وفاقی منصوبوں کی فنڈنگ کی صورت میں 1.7 ارب ڈالر کے فنڈز مل جائیں گے، تاہم، ڈالر کے ریٹ میں کوئی بھی تبدیلی پورے بجٹ کو غیر حقیقی بنا سکتی ہے اور حکومت کو ضمنی گرانٹس کی ضرورت پڑ سکتی ہے۔ حکومت نے اگلے مالی سال کے لیے ڈالر کی قیمت 290 روپے تک جانے کا تخمینہ لگایا ہے، جبکہ رواں مالی سال کے دوران ڈالر کی اوسط قیمت 285 رہی ہے اور جمعے کو انٹر بینک میں ڈالر کا ریٹ 279 روپے تھا۔
وزیر خزانہ 10 جون کو بجٹ کا اعلان کرنے کا ارادہ رکھتے ہیں، لیکن وزیراعظم کے دورہ چین کی وجہ سے بجٹ 10 جون کے بعد بھی پیش کیا جا سکتا ہے۔ اگر پاکستان آئی ایم ایف کی شرائط پر پورا اترتا ہے تو جولائی تک اسٹاف لیول معاہدہ ممکن ہے، جس سے بروقت معاہدہ ہونے پر کرنسی پر دباؤ کم کرنے میں مدد ملے گی۔