جوڑیا بازار میں غیر قانونی تجاوزات کے خلاف بڑا آپریشن کیا گیا۔ کارروائی کے دوران 5 ملزمان گرفتار کرلیے گئے۔ انتظامیہ نے تین ٹرک سامان بھی ضبط کرلیا۔
کمشنر کراچی کے احکامات پر اسسٹنٹ کمشنر آرام باغ اسامہ بن اشرف نے آپریشن کی نگرانی کی۔ کارروائی کے دوران غیر قانونی تھڑے اور پتھارے مسمار کردیے گئے۔
غیر قانونی تجاوزات کے خلاف کارروائی
انتظامیہ نے بازار کے مختلف مقامات سے تجاوزات ختم کردیں۔ تجاوزات کے لیے استعمال ہونے والا سامان بھی موقع پر تلف کیا گیا۔ ضبط شدہ سامان تین ٹرکوں میں منتقل کردیا گیا۔
عوامی راستوں پر قبضے برداشت نہیں ہوں گے
اسسٹنٹ کمشنر آرام باغ اسامہ بن اشرف نے کہا کہ جوڑیا بازار شہر کا اہم تجارتی مرکز ہے۔ یہاں عوام اور تاجروں کی آمدورفت بہتر بنانے کے لیے راستے کھلے رکھنا ضروری ہے۔
انہوں نے واضح کیا کہ سڑکوں، فٹ پاتھوں اور عوامی گزرگاہوں پر غیر قانونی قبضے برداشت نہیں کیے جائیں گے۔
اسامہ بن اشرف کے مطابق تجاوزات کے خاتمے کا مقصد ٹریفک اور آمدورفت کے مسائل کم کرنا ہے۔ جوڑیا بازار سمیت شہر کے دیگر علاقوں میں بھی کارروائیاں جاری رہیں گی۔
انتظامیہ نے کہا کہ قانون کی خلاف ورزی کرنے والوں کے خلاف ضابطے کے مطابق کارروائی ہوگی۔ عوامی مقامات سے غیر قانونی قبضے ختم کرنے میں کوئی نرمی نہیں برتی جائے گی۔
