خواجہ اجمیر نگری پولیس مقابلہ ہلاک ملزم کامران گل کا کرمنل ریکارڈ سامنے آگیا

خواجہ اجمیر نگری میں پولیس مقابلے کے دوران ہلاک ہونے والے ملزم کامران گل کا سابقہ کرمنل ریکارڈ سامنے آگیا۔

ترجمان ایس ایس پی ڈسٹرکٹ سینٹرل ڈاکٹر محمد عمران خان کے مطابق ملزم کامران گل ولد اختر گل مختلف تھانوں میں درج مقدمات میں ملوث رہا تھا۔

پولیس ریکارڈ کے مطابق اس کے خلاف غیر قانونی اسلحہ، موٹر سائیکل چوری، ڈکیتی اور راہزنی سمیت دیگر جرائم کے مقدمات درج تھے۔ ان میں منگھوپیر، بلال کالونی، سرسید، خواجہ اجمیر نگری، سمن آباد اور ایف بی ایریا کے تھانے شامل ہیں۔

سیکٹر 2 میں ڈکیتی کی واردات میں مبینہ ملوث

پولیس کے مطابق کامران گل 8 اکتوبر 2026 کو سیکٹر 2، نارتھ کراچی میں ہونے والی ڈکیتی کی واردات میں مبینہ طور پر ملوث تھا۔

اس واقعے کا مقدمہ نمبر 791/2026 تھانہ خواجہ اجمیر نگری میں درج کیا گیا۔ مقدمے میں تعزیرات پاکستان کی دفعات 392، 397 اور 34 شامل ہیں۔

ترجمان کے مطابق واردات کے دوران ملزمان نے شہری سے تین موبائل فون اور 80 ہزار روپے نقد چھینے تھے۔

پولیس نے واردات کے بعد ملزمان کے فرار ہونے کی سی سی ٹی وی فوٹیج بھی حاصل کی۔ ترجمان کے مطابق فوٹیج کی مدد سے ملزمان کی شناخت کی گئی۔ ہلاک ملزم کے قبضے سے مبینہ طور پر چھینا گیا ایک موبائل فون بھی برآمد ہوا۔

پولیس مقابلے میں ملزم ہلاک

پولیس کے مطابق گزشتہ شب خواجہ اجمیر نگری کے علاقے میں مقابلے کے دوران کامران گل زخمی ہوا تھا۔ اسے اسپتال منتقل کیا جارہا تھا کہ راستے میں اس کی موت ہوگئی۔

پولیس کا کہنا ہے کہ ملزم کا ساتھی زخمی حالت میں فرار ہوگیا۔ اس کی گرفتاری کے لیے تلاش جاری ہے۔