وزیر داخلہ و قانون سندھ ضیاء الحسن لنجار نے محکمہ قانون کے نئے ویب پورٹل کا افتتاح کردیا۔ تقریب سندھ اسمبلی کے کمیٹی روم میں ہوئی۔
سیکرٹری قانون سعید شیخ کے مطابق محکمہ قانون نے یہ پورٹل خود تیار کیا ہے۔ اس پر 1937 سے اب تک سندھ کے قوانین اور گزٹ دستیاب ہوں گے۔
پورٹل میں جدید سرچ کی سہولت شامل ہے۔ اس کے ذریعے مصنوعی ذہانت پر مبنی قانونی معاونت بھی حاصل کی جاسکے گی۔ کیو آر کوڈ سے دستاویزات کی تصدیق بھی ممکن ہوگی۔
قانونی معلومات تک آسان رسائی
ڈائریکٹر آئی ٹی نے تقریب میں پورٹل پر بریفنگ دی۔ انہوں نے وزیر قانون کو اس کی خصوصیات اور ڈیجیٹل اقدامات سے آگاہ کیا۔
ضیاء الحسن لنجار نے کہا کہ ٹیکنالوجی سے قانونی معلومات تک رسائی آسان ہوگی۔ اس سے شفافیت اور سرکاری خدمات کی فراہمی بھی بہتر ہوگی۔
وزیر قانون نے سندھ حکومت سے متعلق عدالتی مقدمات کی تازہ معلومات بھی پورٹل سے منسلک کرنے کی ہدایت دی۔
سیکرٹری قانون کے مطابق ایڈووکیٹ جنرل سندھ اور پراسیکیوٹر جنرل سندھ کے دفاتر بھی پورٹل سے منسلک کیے جائیں گے۔
بار ایسوسی ایشنز کے نمائندوں کی شرکت
تقریب میں سیکرٹری قانون، ایڈووکیٹ جنرل سندھ اور سولیسٹر سندھ شریک ہوئے۔ ڈائریکٹر جنرل مانیٹرنگ، انسپیکشن اینڈ ایویلیوایشن سمیت دیگر سینئر افسران بھی موجود تھے۔
کراچی بار ایسوسی ایشن، سندھ بار کونسل اور سندھ ہائی کورٹ بار ایسوسی ایشن کے نمائندوں نے بھی شرکت کی۔