ڈاکٹر آکاش قتل کیس میں پولیس نے تفتیشی رپورٹ جوڈیشل مجسٹریٹ جنوبی کی عدالت میں جمع کرا دی۔ رپورٹ میں ایک نامعلوم خاتون کے مبینہ ملوث ہونے کا انکشاف کیا گیا ہے۔
پولیس کے مطابق کیس میں ایک خاتون کی شناخت تاحال نہیں ہو سکی، جبکہ دو ملزمان اب بھی مفرور ہیں۔ تفتیشی ٹیم ان کی گرفتاری کے لیے کارروائی جاری رکھے ہوئے ہے۔
رپورٹ میں کہا گیا ہے کہ گرفتار ملزمان نے اعتراف کیا کہ وہ 13 جولائی کو تین موٹر سائیکلوں اور ایک کار میں بینک پہنچے تھے۔ ان کے مطابق انہوں نے بینک سے رقم نکال کر آنے والے ایک شخص سے نقد رقم چھینی۔
ملزمان نے بتایا کہ واردات کے دوران موقع پر موجود سیکیورٹی گارڈ نے فائرنگ کی۔ ان کے بقول، انہوں نے جوابی فائرنگ کی اور وہاں سے فرار ہو گئے۔
پولیس نے عدالت کو بتایا کہ واردات میں استعمال ہونے والی موٹر سائیکل تاحال برآمد نہیں ہوئی۔ مفرور ملزمان کی گرفتاری بھی تفتیش کا اہم حصہ ہے۔
واضح رہے کہ گزشتہ روز ڈی آئی جی ساؤتھ اسد رضا نے دعویٰ کیا تھا کہ ڈکیتی کے دوران فائرنگ کر کے ڈاکٹر آکاش کو قتل کرنے والے ملزمان کو گرفتار کر لیا گیا ہے۔
ڈی آئی جی ساؤتھ اسد رضا، ڈی آئی جی سی آئی اے مقدس حیدر اور دیگر افسران نے پریس کانفرنس میں بتایا تھا کہ فریئر کے علاقے میں ڈاکوؤں نے واردات کے دوران ڈاکٹر آکاش کو نشانہ بنایا۔
