بارکھان (بلوچستان): ضلع بارکھان کے علاقے نوشم میں سکیورٹی فورسز نے بھارتی حمایت یافتہ فتنہ الہندوستان سے تعلق رکھنے والے دہشت گردوں کے خلاف بڑا کلیئرنس آپریشن کیا، جس کے دوران 7 دہشت گرد ہلاک جبکہ پاک فوج اور فرنٹیئر کور کے 5 اہلکار شہید ہوگئے۔
آئی ایس پی آر کے مطابق پاک فوج اور فرنٹیئر کور بلوچستان کے دستوں نے خفیہ اطلاعات کی بنیاد پر علاقے میں کارروائی کی، جہاں شدید فائرنگ کے تبادلے میں دہشت گردوں کے گروہ کو نشانہ بنایا گیا۔
بیان میں کہا گیا کہ ہلاک ہونے والے دہشت گردوں سے اسلحہ، گولہ بارود اور دھماکا خیز مواد بھی برآمد کیا گیا ہے۔
جھڑپ کے دوران وطن کے دفاع میں جان کا نذرانہ پیش کرنے والے شہداء میں میجر توصیف احمد بھٹی سمیت پاک فوج کے 5 بہادر اہلکار شامل ہیں۔
آئی ایس پی آر کے مطابق یہ آپریشن فتنہ الہندوستان کے دہشت گرد نیٹ ورک کے خاتمے کے لیے کیا گیا، اور فورسز نے مؤثر کارروائی کرتے ہوئے ان کے ٹھکانے کو نشانہ بنایا۔
مزید کہا گیا ہے کہ ملک سے غیر ملکی سرپرستی میں ہونے والی دہشت گردی کے مکمل خاتمے کے لیے سکیورٹی فورسز کی کارروائیاں جاری رہیں گی۔