کراچی (اسٹاف رپورٹر) — کراچی کے پوش علاقے ڈیفنس فیز 7 ایکسٹینشن میں اسنیپ چیکنگ کے دوران گاڑی روکنے پر خاتون پولیس افسر کا بیٹا مشتعل ہو گیا اور پولیس اہلکاروں سے بدتمیزی، گالم گلوچ اور ہاتھا پائی کی کوشش کرنے لگا۔ واقعے کی ویڈیو سوشل میڈیا پر وائرل ہونے کے بعد پولیس حکام نے فوری نوٹس لیتے ہوئے ملزم کو گرفتار کر لیا۔
پولیس ذرائع کے مطابق واقعہ اس وقت پیش آیا جب ڈیفنس تھانے کی حدود میں معمول کی اسنیپ چیکنگ جاری تھی۔ اس دوران اہلکاروں نے مشکوک گاڑی کو رکنے کا اشارہ کیا، تاہم گاڑی میں موجود نوجوان، جو مبینہ طور پر ایک خاتون پولیس افسر کا بیٹا بتایا جا رہا ہے، طیش میں آ گیا اور اسنیپ چیکنگ پر مامور سب انسپکٹر سے بدتمیزی شروع کر دی۔
عینی شاہدین کے مطابق نوجوان نے پولیس افسر کا گریبان پکڑا، اہلکاروں کو دھمکیاں دیں اور مسلسل نازیبا زبان استعمال کرتا رہا۔ وائرل ویڈیو میں بھی نوجوان کو پولیس اہلکاروں سے جھگڑتے اور چیختے ہوئے واضح طور پر دیکھا جا سکتا ہے۔
ذرائع کا کہنا ہے کہ گاڑی پر مبینہ طور پر پولیس لائٹس اور جعلی نمبر پلیٹ بھی نصب تھی، جبکہ گاڑی میں دو نجی سیکیورٹی گارڈز بھی موجود تھے۔ پولیس اہلکاروں نے جب گاڑی کی جانچ پڑتال شروع کی تو معاملہ مزید کشیدہ ہوگیا۔
واقعے کی ویڈیو سوشل میڈیا پر وائرل ہونے کے بعد سید اسد رضا، ڈی آئی جی ساؤتھ نے فوری نوٹس لیتے ہوئے ایس ایس پی ساؤتھ کو جامع تحقیقات کی ہدایت جاری کی۔ بعد ازاں پولیس نے کارروائی کرتے ہوئے خاتون پولیس افسر کے بیٹے کو گرفتار کر لیا جبکہ متنازع گاڑی بھی تحویل میں لے لی گئی۔
پولیس حکام کے مطابق واقعے کی ہر پہلو سے تحقیقات جاری ہیں اور اگر گاڑی پر جعلی نمبر پلیٹ یا غیر قانونی پولیس لائٹس نصب ہونے کی تصدیق ہوئی تو مزید مقدمات بھی درج کیے جائیں گے۔