واشنگٹن: امریکی صدر ڈونلڈ ٹرمپ نے نائب صدر جے ڈی وینس کو ایران کے ساتھ جاری کشیدگی سے نکلنے کا راستہ تلاش کرنے کی ہدایت دے دی ہے۔ عالمی میڈیا رپورٹس کے مطابق جے ڈی وینس ٹرمپ انتظامیہ میں جنگ کے سب سے بڑے ناقد سمجھے جاتے ہیں اور ماضی میں بھی وہ عسکری کارروائیوں کی مخالفت کرتے رہے ہیں۔
صدر ٹرمپ نے ایک انٹرویو میں کہا کہ اسلام آباد میں ہونے والے مذاکرات کے نتیجے میں ایران کے ساتھ ممکنہ امن معاہدے کے حوالے سے وہ پُرامید ہیں۔ انہوں نے کہا کہ مذاکرات کے ذریعے خطے میں کشیدگی کم کرنے کی کوششیں جاری ہیں۔
ٹرمپ کے مطابق اسرائیلی وزیرِ اعظم بنجمن نیتن یاہو سے ٹیلیفونک رابطہ ہوا، جس میں انہوں نے لبنان پر حملوں میں کمی کی یقین دہانی کرائی۔ امریکی صدر کا کہنا تھا کہ حالیہ دنوں میں لبنان پر اسرائیلی حملوں میں کمی بھی دیکھی گئی ہے۔
امریکی قیادت نے تمام فریقین پر زور دیا ہے کہ وہ تحمل کا مظاہرہ کریں اور خطے میں امن و استحکام کے لیے سفارتی راستہ اختیار کریں۔