انگلش کلب چیلسی نے اسٹامفورڈ برج میں کھیلے گئے چیمپیئنز لیگ میچ میں ایجیکس کو 1-5 سے شکست دے کر زبردست کامیابی حاصل کر لی۔ ایجیکس کے کپتان کینتھ ٹیلر کے 15ویں منٹ میں ریڈ کارڈ نے میچ کا نقشہ بدل دیا اور چیلسی نے عددی برتری کا بھرپور فائدہ اٹھایا۔
لیورپول کا شاندار کم بیک فرینکفرٹ کو 1-5 سے شکست دے کر چیمپیئنز لیگ میں دھماکے دار واپسی
چیلسی کے منیجر اینزو ماریسکا کی جانب سے ٹیم میں 10 تبدیلیوں کا فیصلہ درست ثابت ہوا۔ مارک گیو اور مویسس کیسیڈو نے پہلے ہاف میں گول کیے جبکہ اینزو فرنینڈز اور ایسٹیواو نے پنالٹی کک سے اسکور میں اضافہ کیا۔
دوسرے ہاف میں نوجوان کھلاڑی ٹائریک جارج نے بھی شاندار گول کر کے تاریخ رقم کر دی — یہ چیمپیئنز لیگ کی تاریخ میں پہلا موقع تھا جب ایک ہی ٹیم کے تین نوجوان کھلاڑیوں نے گول کیے۔
میچ کے بعد ماریسکا نے کہا:
"ہمیں اپنے نوجوان کھلاڑیوں پر مکمل بھروسہ ہے، یہ ہماری کلب کی حکمت عملی ہے کہ نئے ٹیلنٹ کو آگے لایا جائے۔”
ایجیکس کے لیے مشکلات کا آغاز اس وقت ہوا جب وی اے آر مداخلت کے بعد کینتھ ٹیلر کے خطرناک چیلنج کو پیلے سے ریڈ کارڈ میں تبدیل کر دیا گیا۔ اس کے بعد چیلسی نے کھیل پر مکمل کنٹرول حاصل کر لیا۔
ایجیکس نے مختصر طور پر واپسی کی کوشش کی اور واؤٹ ویگھورسٹ نے پنالٹی سے گول کر کے اسکور 2-1 کیا، مگر چیلسی نے وقفے سے قبل مزید دو پنالٹیز حاصل کر کے کھیل کو یکطرفہ بنا دیا۔
18 سالہ ایسٹیواو نے اپنے چیمپیئنز لیگ کیریئر کا پہلا گول شاندار انداز میں کیا، جب کہ دوسرے ہاف میں متبادل کے طور پر آنے والے ٹائریک جارج نے تین منٹ بعد ہی خوبصورت بیک ہیل پاس سے گول کر کے میچ کا اختتام یادگار بنا دیا۔
اس فتح کے بعد چیلسی چیمپیئنز لیگ میں مسلسل دوسری کامیابی کے ساتھ اعتماد بحال کرنے میں کامیاب ہو گئی جبکہ ایجیکس پوائنٹس ٹیبل میں سب سے نیچے ہے اور اب تک کسی میچ میں کامیابی حاصل نہیں کر سکا۔