اسلام آباد — پاکستان کے 78ویں یومِ آزادی پر صدر مملکت آصف علی زرداری اور وزیراعظم شہباز شریف نے قوم کو مبارکباد دیتے ہوئے کہا ہے کہ معرکہ حق اور آپریشن بنیان مرصوص میں حالیہ کامیابی نے پاکستانی عوام کے دلوں میں نئی امنگ اور جذبہ پیدا کر دیا ہے، جس سے آزادی کی خوشیاں دوبالا ہو گئی ہیں۔
یومِ آزادی پر سندھ کی ہندو برادری کا پاکستان سے اظہارِ محبت اور وفاداری
صدر آصف علی زرداری نے اپنے پیغام میں بانیِ پاکستان قائداعظم محمد علی جناحؒ اور تحریکِ پاکستان کے کارکنان کو خراجِ عقیدت پیش کرتے ہوئے کہا کہ اس سال یوم آزادی بڑے افتخار اور تازہ امید کے ساتھ منایا جا رہا ہے۔ انہوں نے کہا کہ بھارت کی بلاجواز جارحیت کے جواب میں پاکستان نے تحمل، حکمت اور بھرپور قوت کے ساتھ اپنا دفاع کیا اور دنیا کو یہ پیغام دیا کہ پاکستان امن کا خواہاں ہے مگر اپنی خودمختاری اور سالمیت پر کسی دباؤ کے آگے نہیں جھکے گا۔
صدر مملکت نے کہا کہ یہ عسکری فتح نہ صرف عوام کے اعتماد کو مضبوط کرتی ہے بلکہ اس اتحاد، یکسوئی اور عزم کی یاد دہانی بھی کراتی ہے جو قومی ترقی کے تمام شعبوں میں کامیابی کی ضمانت ہے۔ انہوں نے کہا کہ اسی جذبے کو معاشی بحالی، تعلیمی و تکنیکی ترقی اور ماحولیاتی تحفظ کے لیے بروئے کار لانا ہوگا۔ ساتھ ہی انہوں نے کشمیری عوام کے حقِ خود ارادیت کی حمایت جاری رکھنے کا عزم بھی دہرایا۔
وزیراعظم شہباز شریف نے اپنے پیغام میں کہا کہ پاکستان کا 78 سالہ سفر مشکلات، قربانیوں اور کامیابیوں سے عبارت ہے، اور ہر میدان میں پاکستانیوں نے اپنی صلاحیتوں کا لوہا منوایا ہے۔ انہوں نے کہا کہ 6 سے 10 مئی 2025 کے دوران بھارت کی مسلط کردہ جنگ میں پاکستان کی شاندار فتح نے اس یوم آزادی کو مزید تاریخی بنا دیا ہے۔
وزیراعظم نے کہا کہ مسلح افواج نے دشمن کے غرور کو چکنا چور کر کے دو قومی نظریے کی صداقت ثابت کر دی۔ انہوں نے عوام کو معاشی ریلیف دینے کے لیے بجلی کی قیمتوں میں کمی سمیت ترقیاتی اقدامات کا ذکر کرتے ہوئے کہا کہ معاشی طور پر ناقابلِ تسخیر ہونا قومی سلامتی کے لیے ناگزیر ہے۔
شہباز شریف نے تمام سیاسی جماعتوں اور طبقات کو اتحاد کی دعوت دیتے ہوئے کہا کہ قومی مفاد کے تحفظ اور ترقی کے لیے مل کر کام کیا جائے تاکہ وہ پاکستان تشکیل دیا جا سکے جس کا خواب ہمارے اسلاف اور شہداء نے دیکھا تھا۔