چیف سیکریٹری سندھ آصف حیدر شاہ کے حکم پر خارس ہاؤس کی غیر قانونی مسماری کے حوالے سے تحقیقات مکمل کر لی گئیں۔ ان تحقیقات میں ایس بی سی اے کے افسران اور عمارت کے مالک کے خلاف ایف آئی آر درج کرنے کا حکم دیا گیا ہے۔
اس کیس میں سندھ بلڈنگ کنٹرول اتھارٹی (ایس بی سی اے) کے ڈائریکٹر ساؤتھ اشفاق حسین اور ڈپٹی ڈائریکٹر ساؤتھ آغا کاشف کو معطل کر دیا گیا ہے۔ اسی طرح، جائیداد کے مالک کے خلاف بھی ایف آئی آر درج کی گئی ہے۔
کمشنر کراچی نے اس غیر قانونی مسماری کی رپورٹ چیف سیکریٹری سندھ کو جمع کروائی، جس کے بعد ایس بی سی اے افسران اور جائیداد مالک کے خلاف کارروائی کا آغاز کیا گیا۔
رپورٹ میں کہا گیا کہ ایس بی سی اے کے افسران نے جان بوجھ کر قوانین کی خلاف ورزی کی اور عید کی تعطیلات کے دوران تاریخی عمارت کی مسماری کی۔ ثقافت و ورثہ کے محکمے کو نظر انداز کرنا اور عدالتی حکم کا غلط حوالہ دینا بھی سنگین غفلت قرار دیا گیا۔ انکوائری رپورٹ میں اس بات کی نشاندہی کی گئی کہ سرکاری افسران اور جائیداد مالک کے درمیان ملی بھگت تھی۔
چیف سیکریٹری سندھ آصف حیدر شاہ نے تمام تاریخی عمارتوں کا سروے اور نقشہ سازی کرنے کی ہدایت دی ہے۔ اس کے علاوہ، محکمہ ثقافت کو تاریخی عمارتوں کی نگرانی کرنے کی بھی ہدایت جاری کی گئی ہے۔