وزارت خزانہ کی جانب سے جاری کردہ اعلامیے کے مطابق، وزیر خزانہ و محصولات محمد اورنگ زیب نے شیعہ اسماعیلی مسلمانوں کے 49 ویں موروثی امام، مرحوم شہزادہ کریم الحسینی آغا خان چہارم کی نماز جنازہ میں شرکت کی۔ اس موقع پر انہوں نے شیعہ اسماعیلی مسلمانوں کے 50 ویں امام، شہزادہ رحیم الحسینی آغا خان پنجم سے ملاقات کی۔
رجب بٹ عدالتی حکم کی خلاف ورزی پر مشکل میں، وائلڈلائف حکام کا کارروائی کا اعلان
اعلامیے میں بتایا گیا کہ وزیر خزانہ نے صدر، وزیر اعظم، اور پاکستانی عوام کی جانب سے مرحوم پرنس کریم آغا خان کے انتقال پر دلی تعزیت کا اظہار کیا۔ وزیر خزانہ نے آغا خان ڈویلپمنٹ نیٹ ورک کی انسانی ترقی، معاشی اصلاحات، اور ثقافتی ورثے کے تحفظ میں خدمات کو خراج تحسین پیش کیا۔
وزیر خزانہ نے کہا کہ مرحوم پرنس کریم آغا خان کی وفات نہ صرف ان کے خاندان، دوستوں اور پیروکاروں کے لیے بلکہ دنیا بھر کے پسماندہ اور نادار طبقات کے لیے بھی ایک ناقابل تلافی نقصان ہے۔
اعلامیے میں مزید کہا گیا کہ وزیر خزانہ نے مرحوم پرنس کریم آغا خان کی پاکستان اور اس کے عوام سے خصوصی وابستگی کو یاد کیا۔ حکومت پاکستان نے پرنس کریم آغا خان کی آخری رسومات کے موقع پر 8 فروری 2025 کو قومی سوگ کا دن قرار دیا ہے۔
آج ملک بھر میں اور بیرون ملک پاکستانی سفارت خانوں میں پاکستانی پرچم سرنگوں ہے۔ یہ دن مرحوم پرنس کریم آغا خان کی غیر معمولی خدمات اور ان کے انسان دوست مشن کی یادگار کے طور پر منایا جا رہا ہے۔