واکنگ بارڈرز کے مطابق، افریقی ملک موریطانیہ سے غیر قانونی طور پر اسپین جانے کی کوشش کرنے والی کشتی خوفناک حادثے کا شکار ہو گئی، جس میں 44 پاکستانیوں سمیت 50 افراد ہلاک ہو گئے۔ یہ کشتی 2 جنوری کو موریطانیہ سے روانہ ہوئی تھی اور اس میں 86 تارکین وطن سوار تھے، جن میں 66 پاکستانی شامل تھے۔ مراکشی حکام نے بدھ کو کشتی سے 36 افراد کو بچا لیا۔
سعید میمن جرنلسٹس پروٹیکشن کمیشن کے سیکریٹری مقرر
یہ تارکین وطن بحر اوقیانوس کے خطرناک راستے سے کینری جزائر پہنچنے کی کوشش کر رہے تھے۔ کشتی کئی دنوں تک لاپتہ رہی، اور حکام کو تاخیر سے اطلاع ملی۔ غیر سرکاری تنظیم الارم فون نے 12 جنوری کو اسپین کی میری ٹائم ریسکیو سروس سے رابطہ کیا، لیکن اس وقت کشتی کے بارے میں کوئی معلومات فراہم نہ کی جا سکیں۔
2024 میں مائیگریشن اموات کا ریکارڈ
واکنگ بارڈرز کے مطابق، 2024 میں اسپین پہنچنے کی کوشش میں 10,457 تارکین وطن ہلاک ہوئے، جن میں زیادہ تر بحر اوقیانوس کے راستے پر جان سے گئے۔ یہ تعداد روزانہ 30 افراد کے برابر ہے۔ کینری جزائر اس خطرناک مائیگریشن راستے کا بڑا مرکز بن گیا ہے۔
بلاول بھٹو زرداری کا اظہارِ تعزیت
پاکستان پیپلز پارٹی کے چیئرمین بلاول بھٹو زرداری نے کشتی حادثے پر گہرے دکھ اور تعزیت کا اظہار کیا ہے۔ انہوں نے قیمتی جانوں کے ضیاع کو صدمہ قرار دیا اور حکومت پر زور دیا کہ لاشوں کی فوری وطن واپسی اور درست معلومات کی فراہمی یقینی بنائی جائے۔ انہوں نے انسانی اسمگلنگ کی روک تھام کے لیے مؤثر اقدامات کی ضرورت پر زور دیا اور عوام سے اپیل کی کہ اپنے پیاروں کو انسانی اسمگلنگ کے مجرموں کے حوالے نہ کریں۔
بلاول نے مزید کہا کہ یہ حادثہ پوری قوم کے لیے لمحہ فکریہ ہے اور حکومتی اداروں کو فوری اقدامات کرنے کی ضرورت ہے۔