تشکر نیوز: پاک بحریہ کی کمانڈ اینڈ اسٹاف کانفرنس نیول ہیڈ کوارٹرز اسلام آباد میں اختتام پذیر ہو گئی۔ کانفرنس کی صدارت چیف آف دی نیول اسٹاف ایڈمرل نوید اشرف نے کی۔ اس اہم فورم میں شمالی بحیرہ عرب اور خلیج عدن میں بحری صورتحال کا تفصیلی جائزہ لیا گیا، اور خطے سے گزرنے والی قومی سمندری تجارت کے تحفظ اور سلامتی کے اقدامات پر غور کیا گیا۔
لیفٹیننٹ عزیر محمود کے والد کا بیٹے کی شہادت پر قوم کے نام پیغام
کانفرنس کے دوران جیو اسٹریٹجک ماحول، قومی سلامتی، پاک بحریہ کی آپریشنل تیاریوں، تربیت، اور اہلکاروں کی فلاح و بہبود کے امور پر بھی گفتگو کی گئی۔ چیف آف دی نیول اسٹاف کو پاک بحریہ کے حالیہ اور مستقبل کے ترقیاتی منصوبوں پر جامع بریفنگ دی گئی، جس سے آئندہ کے لائحہ عمل کی وضاحت کی گئی۔
نیول چیف نے جنگی تیاریوں اور میری ٹائم ڈومین میں پاک بحریہ کے اہم کردار پر بھرپور اعتماد کا اظہار کیا۔ انہوں نے کہا کہ ہماری کوشش ہے کہ ہم میری ٹائم سیکیورٹی کو مضبوط کریں اور جنگی تیاریوں کو برقرار رکھیں تاکہ پاکستان کے خلاف کسی بھی ممکنہ جارحیت کا مؤثر جواب دیا جا سکے۔ ایڈمرل نوید اشرف نے جدید دور کے میری ٹائم چیلنجز کا مقابلہ کرنے کے لیے مقامی ذرائع سے فائدہ اٹھاتے ہوئے منفرد اور نئی صلاحیتوں کے حصول پر بھی زور دیا۔
پاک بحریہ کی کمانڈ اینڈ اسٹاف کانفرنس پاکستان نیوی کا ایک اہم فیصلہ ساز ادارہ ہے، جس میں چیف آف دی نیول اسٹاف کے ساتھ تمام پرنسپل اسٹاف آفیسرز اور فیلڈ کمانڈرز پاکستان نیوی کی پالیسیوں اور منصوبوں کا جائزہ لیتے ہیں۔ اس کانفرنس نے پاک بحریہ کی حکمت عملیوں اور مستقبل کی سمت کو واضح کرنے میں اہم کردار ادا کیا ہے۔