اسلام آباد: اڈیالہ جیل میں بجلی کی بندش کے باعث ایمان مزاری اور ان کے شوہر ہادی علی چٹھہ کی ویڈیو لنک کے ذریعے عدالت میں پیشی نہ ہوسکی، جس کے باعث ان پر فرد جرم عائد نہیں کی جاسکی۔
انسداد دہشت گردی عدالت اسلام آباد کے جج طاہر عباس سپرا نے انٹرنیشنل کرکٹ ٹیم کی آمد کے موقع پر روٹ توڑنے اور لوگوں میں اشتعال پیدا کرنے کے مقدمے کی سماعت کی۔
سماعت کے دوران پراسیکیوٹر راجا نوید اور ملزمان کے مرکزی وکلا کے جونیئر عدالت میں پیش ہوئے۔
مرکزی وکلا کی عدم موجودگی
جونیئر وکیل نے عدالت کو بتایا کہ مرکزی وکلا ہائیکورٹ میں موجود ہیں۔ انہوں نے چالان کی نقول فراہم کرنے اور سماعت کے لیے تاریخ مقرر کرنے کی استدعا کی۔
جج طاہر عباس سپرا نے ریمارکس دیے کہ چالان کی نقول پہلے ہی فراہم کی جاچکی ہیں اور آج فرد جرم عائد ہونا تھی۔
جونیئر وکیل نے مؤقف اختیار کیا کہ ملزمان کو وکلا سے ملاقات کی رسائی نہیں دی جارہی۔ عدالت نے ہدایت کی کہ جیل حکام ملزمان کی وکلا سے ملاقات یقینی بنائیں۔
بجلی بندش کے باعث ویڈیو لنک پیشی نہ ہوسکی
عدالت نے مرکزی وکلا کو ساڑھے 11 بجے پیش ہونے کی ہدایت کرتے ہوئے سماعت میں وقفہ کیا۔
تاہم اڈیالہ جیل میں بجلی کی بندش کے باعث ایمان مزاری اور ہادی علی چٹھہ کو ویڈیو لنک کے ذریعے عدالت میں پیش نہیں کیا جاسکا۔
پی ٹی آئی لانگ مارچ کے باعث پشاور میں میٹرک کے پرچے ملتوی
اس صورتحال کے باعث عدالت فرد جرم عائد نہ کرسکی۔
جج طاہر عباس سپرا نے جیل حکام کو آئندہ سماعت پر ملزمان کی ویڈیو لنک کے ذریعے حاضری یقینی بنانے کی ہدایت کی۔ انہوں نے خبردار کیا کہ عدم تعمیل کی صورت میں جیل حکام کے خلاف توہین عدالت کی کارروائی ہوسکتی ہے۔
عدالت نے سماعت کل تک ملتوی کردی۔ ایمان مزاری اور ہادی علی چٹھہ پر فرد جرم آئندہ سماعت میں عائد کی جائے گی۔
ملزمان کے خلاف تھانہ آبپارہ میں مقدمہ درج ہے۔
