اسلام آباد: وزیرِ اعظم شہباز شریف نے اپوزیشن کو ایک بار پھر مذاکرات کی دعوت دیتے ہوئے کہا ہے کہ اپوزیشن حکومت کے ساتھ بیٹھ کر بات کرے تاکہ جمہوریت کو مزید مضبوط کیا جا سکے۔
وفاقی کابینہ کے اجلاس سے خطاب کرتے ہوئے وزیراعظم نے کہا کہ حکومت اپوزیشن کے ساتھ مذاکرات کے لیے تیار ہے اور وہ ایک بار پھر بامقصد بات چیت کی دعوت دیتے ہیں۔ انہوں نے کہا کہ تالی دونوں ہاتھوں سے بجتی ہے، اب یہ اپوزیشن پر منحصر ہے کہ وہ کب مذاکرات کی میز پر آتی ہے۔
شہباز شریف نے کہا کہ حکومت نے تاجربرادری کے لیے ایک اچھی اسکیم متعارف کرائی ہے اور تاجروں کو بلاوجہ پریشان کرنے پر سخت کارروائی کی جائے گی۔ انہوں نے بتایا کہ فیڈرل بورڈ آف ریونیو (ایف بی آر) کو واضح ہدایت دی گئی ہے کہ تاجربرادری کو ہراساں نہ کیا جائے۔
جنریشن زی: سندھ کے وزیرِ تعلیم کا نوجوانوں سے بات چیت اور ان کے سوالات سننے پر زور
وزیراعظم نے کہا کہ حکومت نے معیشت کے استحکام کے لیے مختلف اقدامات کیے ہیں اور عوام کو ریلیف دینے کے لیے 128 ارب روپے مختص کیے گئے ہیں۔ ان کے مطابق ملکی معیشت میں بتدریج بہتری آ رہی ہے اور امید ہے کہ آنے والے دنوں میں صورتحال مزید بہتر ہوگی۔
انہوں نے ڈیزل کی قیمت میں کمی کو بھی خوش آئند قرار دیا۔
شہباز شریف نے کہا کہ خطے میں جاری کشیدگی کے باعث تیل کی سپلائی کو مشکلات کا سامنا ہے۔ ان کے مطابق خطے میں صورتحال کی بہتری پاکستانی معیشت کے لیے بھی ضروری ہے۔
