ایران پاکستان تعلقات کے تناظر میں وزیراعظم شہباز شریف نے ایرانی وزیر داخلہ اسکندر مومنی سے ملاقات میں خطے کی صورتحال، دوطرفہ تعاون اور امن کے فروغ سے متعلق امور پر تبادلۂ خیال کیا۔ ملاقات میں اعلیٰ حکومتی اور سکیورٹی حکام بھی شریک تھے۔
ملاقات میں نائب وزیراعظم و وزیر خارجہ سینیٹر محمد اسحاق ڈار، وفاقی وزیر داخلہ سید محسن رضا نقوی، وفاقی وزیر اطلاعات و نشریات عطاء اللہ تارڑ، وزیراعظم کے مشیر ڈاکٹر سید توقیر شاہ، وزیر مملکت برائے داخلہ طلال چودھری اور دیگر اعلیٰ حکام بھی موجود تھے۔
وزیراعظم شہباز شریف نے تہران کے اپنے حالیہ دورے کا ذکر کیا۔ انہوں نے مرحوم سپریم لیڈر آیت اللہ سید علی خامنہ ای کے جنازے میں شرکت اور ایرانی قیادت کے لیے نیک تمناؤں کا پیغام بھی یاد کیا۔
وزیراعظم نے خلیج میں حالیہ کشیدگی پر تشویش ظاہر کی۔ انہوں نے تمام فریقوں پر زور دیا کہ وہ تحمل کا مظاہرہ کریں اور ایسے اقدامات سے گریز کریں جو خطے میں مزید عدم استحکام پیدا کریں۔
انہوں نے کہا کہ پاکستان ایک دیانتدار اور مخلص ثالث و سہولت کار کے طور پر اپنا کردار جاری رکھے گا۔ ان کے مطابق پاکستان خطے میں امن، استحکام اور مذاکرات کے فروغ کے لیے پرعزم ہے۔
ایرانی وزیر داخلہ اسکندر مومنی نے اسلام آباد میں پرتپاک استقبال پر وزیراعظم کا شکریہ ادا کیا اور ایرانی قیادت کی جانب سے نیک خواہشات کا پیغام پہنچایا۔
بارڈر مینجمنٹ: پاکستان اور ایران کا سکیورٹی تعاون مزید مضبوط بنانے پر اتفاق
انہوں نے کہا کہ وہ دونوں ممالک کے تعلقات کو مزید مضبوط بنانے کے لیے اعلیٰ سطح کے سرکاری وفد کے ہمراہ پاکستان آئے ہیں۔
اسکندر مومنی نے وزیراعظم شہباز شریف، نائب وزیراعظم اسحاق ڈار اور فیلڈ مارشل سید عاصم منیر کی سفارتی اور ثالثی کی کوششوں کو بھی سراہا۔ ان کے مطابق انہی کوششوں کے نتیجے میں اسلام آباد مفاہمتی یادداشت طے پائی۔
