کراچی میں اسٹریٹ کرائم کے خلاف کارروائی کے دوران تھانہ ابراہیم حیدری پولیس نے دکانوں میں ڈکیتیوں اور لوٹ مار میں ملوث ایک خطرناک گینگ کے دو اہم ملزمان کو گرفتار کر لیا ہے۔
جوئے کے اڈے پر چھاپہ: ایس آئی یو کی کارروائی، 11 جواری گرفتار، ناجائز اسلحہ برآمد
پولیس کے مطابق 17 اور 18 جون 2026 کو پی اے ایف روڈ، ابراہیم حیدری پر واقع دو مختلف دکانوں میں اسلحے کے زور پر ڈکیتی کی وارداتیں ہوئیں۔ ملزمان نے دکانداروں سے نقدی، موبائل فونز اور دیگر قیمتی اشیا چھین کر فرار حاصل کیا تھا، جس سے علاقے میں خوف و ہراس پھیل گیا۔
واقعے کے بعد پولیس نے سی سی ٹی وی فوٹیجز اور دیگر شواہد کی مدد سے تحقیقات شروع کیں۔ تکنیکی بنیادوں اور انٹیلیجنس معلومات کے ذریعے پولیس نے سرچ آپریشن کیا اور دونوں ملزمان کو گرفتار کر لیا۔
گرفتار ملزمان میں اسد شاہ اور لقمان عرف ابا شامل ہیں۔ پولیس نے بتایا کہ ملزمان اسٹریٹ کرائم کی متعدد وارداتوں میں سرگرم رہے ہیں اور ایک منظم گروہ کے طور پر کام کرتے تھے۔
ملزمان کے خلاف تھانہ ابراہیم حیدری میں مقدمہ نمبر 461/2026 اور 462/2026 درج کیا گیا ہے، جن میں دفعہ 392، 397 اور 34 تعزیراتِ پاکستان شامل ہیں۔
پولیس نے دونوں ملزمان کو مزید تفتیش کے لیے انویسٹی گیشن ونگ کے حوالے کر دیا ہے تاکہ دیگر وارداتوں اور ممکنہ ساتھیوں سے متعلق معلومات حاصل کی جا سکیں۔
