راولپنڈی (تشکر نیوز) آرمی چیف جنرل عاصم منیر سے امریکی اعلیٰ سطحی وفد نے جی ایچ کیو راولپنڈی میں اہم ملاقات کی، جس کے دوران پاکستان میں سرمایہ کاری اور معدنیات کے شعبے میں تعاون پر تفصیلی گفتگو ہوئی۔
آئی ایس پی آر کے مطابق، امریکی وفد کی قیادت سینئر بیوروکریٹ ایرک مئیر نے کی۔ ملاقات میں دو طرفہ دلچسپی کے مختلف امور پر تبادلہ خیال کیا گیا، خصوصاً پاکستان منرلز انویسٹمنٹ فورم 2025 پر خصوصی گفتگو کی گئی۔
آئی ایس پی آر کے ترجمان کا کہنا ہے کہ:
"امریکی انتظامیہ نے پاکستان میں معدنیات کی ترقی کے لیے تعاون کی خواہش ظاہر کی ہے۔”
ایرک مئیر نے اس موقع پر کہا کہ:
"امریکی حکومت پاکستان کے ساتھ معدنی شعبے میں اشتراک کو مزید فروغ دینے کے لیے پرعزم ہے۔”
امریکی وفد نے پاکستان میں سرمایہ کاری کے امکانات میں دلچسپی کا اظہار کرتے ہوئے کہا کہ:
"دونوں ممالک کے درمیان اقتصادی شراکت داری کو مزید مضبوط بنایا جا سکتا ہے۔”
اس ملاقات میں عملی پیش رفت، علاقائی سیکیورٹی کی صورتحال اور حکومتی و نجی شعبے میں باہمی شراکت داری بڑھانے پر بھی اتفاق کیا گیا۔