سندھ حکومت کا پولیس تفتیشی نظام مزید بہتر بنانے کا فیصلہ

کراچی: سندھ حکومت نے پولیس کی تفتیشی صلاحیت کو مزید مؤثر بنانے کے لیے 2 ہزار اے ایس آئی انویسٹیگیشن کی بھرتی کا فیصلہ کیا ہے۔

یہ فیصلہ چیف سیکریٹری سندھ آصف حیدر شاہ کی زیر صدارت سروس اسٹرکچر کمیٹی کے اجلاس میں کیا گیا، جس میں ایڈیشنل چیف سیکریٹری داخلہ، آئی جی سندھ، سیکریٹری فنانس، سیکریٹری سروسز اور دیگر اعلیٰ افسران نے شرکت کی۔

چیف سیکریٹری سندھ نے کہا کہ اس اقدام سے پولیس کی انویسٹیگیشن برانچ کو مضبوط کیا جائے گا، جس سے جرائم کی روک تھام اور تفتیش کے معیار میں بہتری آئے گی۔ آئی جی سندھ غلام نبی میمن نے بھی بھرتیوں کے اس فیصلے کو قانون نافذ کرنے والے اداروں کے لیے مثبت پیش رفت قرار دیا۔

اجلاس میں کراچی پولیس کی 1038 پوسٹس کو نان انویسٹیگیشن سے انویسٹیگیشن یونٹس میں منتقل کرنے کی منظوری دی گئی، جن میں 2 ایس پیز، 17 ڈی ایس پیز، 114 انسپکٹرز، 308 سب انسپکٹرز اور 587 کانسٹیبلز شامل ہیں۔