اپوزیشن لیڈر سندھ علی خورشیدی نے یوم پاکستان کے موقع پر اراکین اسمبلی کے ہمراہ مزار قائد پر حاضری دی اور بابائے قوم کے افکار پر عمل پیرا ہونے کے عزم کا اعادہ کیا۔ اس موقع پر انہوں نے کہا کہ 23 مارچ تجدید عہد کا دن ہے، ہمیں قیام پاکستان کے اصل مقاصد کو یاد رکھنا ہوگا۔
انہوں نے کہا کہ برصغیر کے مسلمانوں نے اپنی جانوں کا نذرانہ دے کر ایک آزاد وطن حاصل کیا، جو محض ایک زمین کا ٹکڑا نہیں بلکہ ایک نظریہ تھا۔ ہمیں اس نظریے کو عملی شکل دینی ہے تاکہ پاکستان حقیقی معنوں میں ایک فلاحی ریاست بن سکے۔
علی خورشیدی نے مزید کہا کہ قیام پاکستان کا خواب رنگ، نسل، زبان اور مذہب کی تفریق سے بالاتر ہو کر سب کے مساوی حقوق پر مبنی تھا۔ آج کے دن ہمیں غور کرنا ہوگا کہ کیا ہم واقعی اس پاکستان کی جانب بڑھ رہے ہیں جس کا خواب ہمارے بزرگوں نے دیکھا تھا؟
انہوں نے کہا کہ پاکستان کی خوش نصیبی ہے کہ اس نظریے کے وارث آج بھی زندہ ہیں۔ ہمیں انتھک محنت کرنی ہوگی تاکہ پاکستان کو اُس منزل تک پہنچا سکیں جس کے لیے ہمارے آباؤ اجداد نے بے شمار قربانیاں دیں۔
اپوزیشن لیڈر نے کہا کہ یوم پاکستان ہمیں یاد دلاتا ہے کہ اگر ہم متحد ہوں تو دنیا کی کوئی طاقت ہمیں جھکا نہیں سکتی۔