بحرین نیشنل گارڈ کے کمانڈر جنرل شیخ محمد بن عیسیٰ بن سلمان الخلیفہ نے نیول ہیڈ کوارٹرز اسلام آباد میں پاکستان نیوی کے سربراہ ایڈمرل نوید اشرف سے اہم ملاقات کی۔
نیول ہیڈ کوارٹرز آمد پر نیول چیف ایڈمرل نوید اشرف نے معزز مہمان کا پرتپاک استقبال کیا۔ بعد ازاں کمانڈر بحرین نیشنل گارڈ کا تعارف نیول ہیڈ کوارٹرز کے پرنسپل اسٹاف آفیسرز سے بھی کرایا گیا۔
ملاقات کے دوران دونوں معزز شخصیات نے باہمی دلچسپی کے امور، خطے کی بحری سلامتی کی مجموعی صورتحال، اور دونوں ممالک کے درمیان عسکری تعاون، دفاع اور تربیت کے شعبوں میں تعاون کے مزید فروغ کے امکانات پر تفصیلی تبادلہ خیال کیا۔
نیول چیف ایڈمرل نوید اشرف نے خطے میں میری ٹائم سیکیورٹی اور امن کے فروغ کے لیے پاک بحریہ کی جانب سے کیے گئے اقدامات، خصوصاً ریجنل میری ٹائم سیکیورٹی پٹرولز (Regional Maritime Security Patrols) پر روشنی ڈالی۔
کمانڈر بحرین نیشنل گارڈ جنرل شیخ محمد بن عیسیٰ نے خطے میں امن و استحکام برقرار رکھنے کے لیے پاک بحریہ کی کوششوں کو سراہا اور دونوں ممالک کے درمیان موجودہ دفاعی تعلقات کو مزید مضبوط بنانے کے عزم کا اعادہ کیا۔
واضح رہے کہ پاکستان اور بحرین کے درمیان گہرے برادرانہ تعلقات قائم ہیں، اور دونوں ممالک کی بحری افواج کے درمیان تربیتی و سیکیورٹی سمیت مختلف شعبوں میں قریبی اور مستحکم تعاون جاری ہے۔
بحرین نیشنل گارڈ کے کمانڈر کا یہ حالیہ دورہ دونوں ممالک کے مابین خصوصاً مسلح افواج کے شعبے میں تعاون کو مزید وسعت دینے اور نئے مواقع پیدا کرنے میں معاون ثابت ہوگا۔