قائم مقام چیف جسٹس سرفراز ڈوگر نے جسٹس بابر ستار کے پرائیویٹ سیکرٹری کی جانب سے مبینہ رشوت ستانی کے ازالے کے لیے لکھے گئے خط پر انکوائری کا حکم دے دیا ہے اور تین دن میں رپورٹ طلب کر لی ہے۔
کوئٹہ میں دہشتگردی کے خدشات، پولیس کو الرٹ رہنے کی ہدایات
رجسٹرار اسلام آباد ہائی کورٹ یار محمد ولانہ اور ایڈیشنل رجسٹرار اسٹیبلشمنٹ رائے محمد خان کو انکوائری کمیٹی مقرر کیا گیا ہے۔ یہ معاملہ رجسٹرار نے قائم مقام چیف جسٹس سرفراز ڈوگر کے سامنے رکھا تھا۔
جسٹس بابر ستار کی ہدایت پر ان کے سیکرٹری نے رجسٹرار کو خط لکھا، جس کی نقول تمام ججز کے سیکرٹریز کو بھی بھیجی گئیں۔ خط میں مطالبہ کیا گیا تھا کہ رشوت ستانی میں ملوث اسٹاف کے خلاف کارروائی کی جائے اور اس برائی کو جڑ سے ختم کیا جائے۔
خط میں مزید نشاندہی کی گئی کہ اسلام آباد ہائی کورٹ کے کورٹ رومز اور کوریڈورز کی ویڈیو مانیٹرنگ ہوتی ہے، رجسٹرار آفس گزشتہ دو ہفتوں کی فوٹیج نکال کر تحقیقات کر سکتا ہے کہ آیا اسٹاف رشوت طلب کر کے رقم وصول کر رہا ہے یا نہیں۔ اگر الزامات درست ثابت ہوتے ہیں تو ملوث افراد کے خلاف سخت ایکشن لیا جائے۔