اسلام آباد: موجودہ حکومت کے ایک سال مکمل ہونے پر جاری کیے گئے "اِپسوس” صارفین کے اعتماد کے سروے کے مطابق معاشی خدشات اب بھی پاکستانی عوام کو پریشان کر رہے ہیں، تاہم امید کی سطح بلند ترین مقام پر پہنچ گئی ہے۔
بہادر سپوت راجا عمر خطاب کی سی ٹی ڈی واپسی پر شاندار استقبال
ملک کی سمت پر عوامی رائے
سروے کے مطابق 10 میں سے 7 پاکستانیوں کا خیال ہے کہ ملک غلط سمت میں جا رہا ہے، تاہم 2024 کی آخری سہ ماہی میں 19 فیصد کے مقابلے میں 2025 کی پہلی سہ ماہی میں ملک کی سمت کے بارے میں امید 31 فیصد تک پہنچ گئی، جو چھ سالوں میں بلند ترین سطح ہے۔
معاشی خدشات اور افراطِ زر
اقتصادی خدشات بدستور موجود ہیں، لیکن 2025 میں ان میں نمایاں کمی دیکھی گئی ہے۔ افراطِ زر کی شرح میں 18 فیصد کمی واقع ہوئی، جو چار سالوں میں اپنی کم ترین سطح پر ہے۔ تاہم، ہر 3 میں سے 2 پاکستانی ملک کی موجودہ معاشی حالت کو کمزور قرار دیتے ہیں، جبکہ اسے مضبوط ماننے والوں کی تعداد 2024 کی پہلی سہ ماہی کے مقابلے میں پانچ گنا بڑھ چکی ہے۔
گھریلو خریداری اور مالی حالات
88 فیصد پاکستانی روزمرہ کی خریداریوں میں عدم اطمینان کا اظہار کرتے ہیں، تاہم گزشتہ ایک سال میں اس حوالے سے اطمینان تین گنا بڑھ گیا ہے۔ اسی طرح، اگست 2024 میں صرف 12 فیصد لوگ مقامی معاشی حالات کے بارے میں پرامید تھے، جو فروری 2025 میں بڑھ کر 31 فیصد ہو گئے، جو صارفین کے اعتماد کی بلند ترین سطح ہے۔
مستقبل کے مالی خدشات اور سرمایہ کاری
ہر 5 میں سے 3 پاکستانیوں کو توقع ہے کہ اگلے 6 ماہ میں ان کے ذاتی مالی حالات کمزور ہو جائیں گے، جبکہ 5 میں سے 1 پرامید ہے۔ مستقبل کی بچت پر اعتماد میں گزشتہ سال کے مقابلے میں 30 فیصد اضافہ ہوا ہے، لیکن اب بھی 88 فیصد پاکستانی سرمایہ کاری کے بارے میں غیر یقینی صورتحال کا شکار ہیں۔
روزگار کا تحفظ
سروے کے مطابق 10 میں سے 8 پاکستانی اپنی ملازمتوں کے حوالے سے غیر محفوظ محسوس کرتے ہیں، جبکہ 19 فیصد افراد خود کو محفوظ سمجھتے ہیں، جن میں مرد اور درمیانی آمدنی والے گروپس سب سے زیادہ پراعتماد ہیں۔ یہ اعتماد کنزیومر کنفیڈنس انڈیکس کی ٹریکنگ شروع ہونے کے بعد سے بلند ترین سطح پر ہے۔