سکھر: نادرا سکھر نے محکمہ صحت حکومت سندھ، سندھ بلڈ ٹرانسفیوژن اتھارٹی اور محمدی بلڈ بینک اینڈ تھیلیسیمیا سینٹر کے تعاون سے تھیلیسیمیا اور ہیپاٹائٹس سے بچاؤ کے لیے خصوصی ڈیسک قائم کر دیا ہے۔ اس سلسلے میں نادرا سکھر میں ایک افتتاحی تقریب منعقد ہوئی، جس کے مہمانِ خصوصی رکن قومی اسمبلی سید خورشید شاہ تھے۔
سربراہ بنگلہ دیش بحریہ ایڈمرل محمد نظم الحسن کا نیول ہیڈکوارٹرز کا دورہ
افتتاحی تقریب میں ڈی جی نادرا عامر علی خان، سی ای او محمدی بلڈ بینک اینڈ تھیلیسیمیا سینٹر سید مہدی رضوی، ڈپٹی کمشنر محمد بخش دھاریجو، ڈی ایچ او یاسر گبول، اور غلام محمد میڈیکل یونیورسٹی کے پروفیسر ڈاکٹر محمد الطاف شیخ سمیت دیگر معزز شخصیات نے شرکت کی۔
مقررین نے اس موقع پر شادی سے پہلے تھیلیسیمیا ٹیسٹ کی اہمیت پر زور دیا اور کہا کہ اس اقدام کے تحت نادرا میں شناختی کارڈ کے لیے آنے والے شہریوں کو تھیلیسیمیا اور خون کے دیگر ٹیسٹ کروانے کے بارے میں آگاہی دی جائے گی۔ اس کے علاوہ، شادی سے پہلے خون کی اسکریننگ اور ایچ بی الیکٹروفوریسس جیسے ٹیسٹ کروانا صحت مند معاشرے کے لیے ناگزیر ہے۔
تقریب میں شریک افراد نے اس اہم اقدام پر حکومت سندھ کی وزیر صحت ڈاکٹر عذرا فضل پیچوہو اور سندھ بلڈ ٹرانسفیوژن اتھارٹی کی سیکریٹری ڈاکٹر درِ ناز جمال کی کاوشوں کو سراہا اور امید ظاہر کی کہ اس مہم سے تھیلیسیمیا اور ہیپاٹائٹس جیسے مہلک امراض کے خلاف مؤثر اقدامات کیے جا سکیں گے۔
یہ اقدام نادرا کی جانب سے شہریوں کو صحت کے متعلق آگاہی فراہم کرنے میں اہم قدم ہے، جو نہ صرف تھیلیسیمیا بلکہ ہیپاٹائٹس جیسے سنگین امراض سے بچاؤ کے لیے مؤثر ثابت ہوگا۔
