سابق کرکٹر معین خان نے اداکارہ و میزبان اُشنا شاہ کے شو میں شرکت کرتے ہوئے موجودہ پاکستانی کرکٹرز کے بھارتی کھلاڑیوں کے ساتھ میدان پر دوستانہ رویے پر تشویش کا اظہار کیا۔ اُشنا شاہ نے سوال کیا کہ ماضی میں پاکستانی کرکٹرز کو سرحد کے پار بھی بے پناہ محبت ملتی تھی، لیکن آج یہ رویہ بدل گیا ہے، اور پاکستانی کھلاڑی بھارتی کرکٹرز کے ساتھ سیلفیاں بناتے نظر آتے ہیں۔
وزیراعظم شہباز شریف: نوجوان دولت مشترکہ ممالک کے روشن مستقبل کی ضمانت
معین خان نے جواب دیا کہ بھارتی کھلاڑیوں کے ساتھ ہنستا کھیلتا دیکھ کر انہیں دکھ ہوتا ہے۔ انہوں نے کہا کہ ماضی میں پاکستانی ٹیم بھارتی ٹیم سے بہت آگے تھی، لیکن آج صورتحال مختلف ہے۔ انہوں نے مزید کہا کہ ان کا بھارتی کھلاڑیوں کے ساتھ عزت پر مبنی تعلق رہا ہے، لیکن میدان میں ایسی دوستانہ حرکات کبھی نہیں کیں جو آج کے کھلاڑی کرتے ہیں، جیسے بیٹ چیک کرنا یا سیلفی بنوانا۔
سابق کرکٹر نے کہا کہ یہ رویہ منفی پیغام دیتا ہے اور حریف ٹیم کو زیادہ طاقتور بننے کا موقع فراہم کرتا ہے کیونکہ ایسا کرنے سے دماغی طور پر کمزوری ظاہر ہوتی ہے۔ معین خان نے اس بات پر زور دیا کہ کھلاڑیوں کو میدان پر جارحانہ رویہ اختیار کرنا چاہیے، جیسا کہ وسیم اکرم، وقار یونس اور شعیب اختر جیسے کھلاڑی کرتے تھے۔
انہوں نے کہا کہ ماضی میں وہ اپنے عہدوں پر رہتے ہوئے کھلاڑیوں کو ایسے رویے سے روکنے کی کوشش کرتے رہے ہیں، اور یہ بات وسیم اکرم جیسے کھلاڑیوں کو بھی کھٹکتی تھی کہ موجودہ نسل میدان پر اپنی جارحیت کھو چکی ہے۔