پاکستان نے 22 سال کے طویل انتظار کے بعد ہوم گراؤنڈ پر آسٹریلیا کو ون ڈے سیریز میں شکست دے کر تاریخ رقم کر دی۔ آخری میچ میں 141 رنز کا ہدف پاکستان نے 26ویں اوور میں باآسانی حاصل کیا۔ کپتان محمد رضوان اور بابر اعظم ناقابلِ شکست رہے، انہوں نے بالترتیب 30 اور 28 رنز اسکور کیے۔
اوپنرز عبداللہ شفیق اور صائم ایوب نے عمدہ آغاز فراہم کیا۔ عبداللہ شفیق نے 37 اور صائم ایوب نے 42 رنز بنائے، دونوں بلے باز لانس مورس کی گیندوں پر آؤٹ ہوئے۔
پاکستانی بولرز نے بہترین کارکردگی کا مظاہرہ کیا، آسٹریلیا کی ٹیم کو 31.5 اوورز میں 140 رنز پر ڈھیر کر دیا۔ آسٹریلیا کا ایک کھلاڑی انجری کے باعث دوبارہ بیٹنگ کے لیے میدان میں نہیں آیا۔ سین ایبٹ 30 رنز کے ساتھ نمایاں رہے جبکہ جیک فریزر میکگورک 7، میتھیو شارٹ 22، اور ایرون ہارڈی 12 رنز بنا سکے۔ کوپر کونولی 7 رنز پر ریٹائرڈ ہرٹ ہوگئے۔
گلین میکسویل مسلسل تیسرے میچ میں حارث رؤف کا شکار بنے اور صفر پر آؤٹ ہوئے۔ مارکس اسٹونئس 8 اور ایڈم زمپا 13 رنز بنا سکے۔ قومی ٹیم کی طرف سے نسیم شاہ اور شاہین شاہ آفریدی نے 3،3 وکٹیں حاصل کیں، جبکہ حارث رؤف نے 2 اور محمد حسنین نے 1 وکٹ اپنے نام کی۔
میچ سے قبل پاکستان نے ٹاس جیت کر پہلے فیلڈنگ کا فیصلہ کیا تھا، جو کامیاب ثابت ہوا۔
