احمد ظفر حیات نے 17ویں چیف آف دی نیول اسٹاف امیچور گالف کپ 2024 کا ٹائٹل اپنے نام کیا، ارتضیٰ حسین نیٹ کیٹیگری کے فاتح قرار
احمد ظفر حیات نے چیف آف دی نیول اسٹاف امیچور گالف کپ 2024 کا ٹائٹل جیت لیا
اسلام آباد، 03 نومبر 2024: احمد ظفر حیات نے 17ویں چیف آف دی نیول اسٹاف امیچور گالف کپ 2024 کا اعزاز حاصل کیا۔ ارتضیٰ حسین نے نیٹ کیٹیگری میں کامیابی حاصل کی، جبکہ عالم افضل، حمنا امجد، اور عبداللہ خان نے بالترتیب سینئر، لیڈیز، اور جونیئر کیٹیگریز میں ٹائٹل جیتے۔ اختتامی تقریب کے مہمان خصوصی چیف آف دی نیول اسٹاف ایڈمرل نوید اشرف تھے۔
تقریب سے خطاب کرتے ہوئے ایڈمرل نوید اشرف نے انعامات حاصل کرنے والے کھلاڑیوں کو شاندار کامیابی پر مبارکباد دی اور ان کی مہارت و اعلیٰ معیار کی تعریف کی۔ انہوں نے اسپانسرز، میڈیا، اور مارگلہ گرین گالف کلب کی انتظامیہ کے تعاون کو بھی سراہا، جس کے بغیر اس گالف کپ کا کامیاب انعقاد ممکن نہ تھا۔
یہ چار روزہ گالف کپ 31 اکتوبر سے 3 نومبر تک مارگلہ گرینز گالف کلب، اسلام آباد میں منعقد ہوا۔ تقریباً 300 گالفرز نے پاکستان بھر سے مختلف کیٹیگریز میں حصہ لیا، جن میں امیچوز، سینئرز، لیڈیز، اور جونیئرز شامل تھے۔ یہ ایونٹ 2007 سے قومی گولف سرکٹ کا باقاعدہ حصہ ہے اور اس کا مسلسل انعقاد پاک بحریہ کے کھیلوں کے فروغ کے عزم کی عکاسی کرتا ہے۔
اختتامی تقریب میں اعلیٰ افسران، منتظمین، اسپانسرز، گالفرز، اور میڈیا کی مختلف شخصیات نے شرکت کی۔
ڈائریکٹر جنرل پبلک ریلیشنز (نیوی)
