تشکر نیوز: وزیراعلیٰ سندھ سید مراد علی شاہ سے اٹلی کی سفیر مس ماریلیا ارمیلن کی ملاقات ہوئی جس میں دونوں ممالک کے درمیان دو طرفہ تعلقات اور باہمی امور پر تفصیلی گفتگو کی گئی۔ ملاقات میں وزیراعلیٰ سندھ کے سیکریٹری رحیم شیخ اور اٹلی کے کراچی میں قونصل جنرل مسٹر ڈنیلو جیورڈینیلا بھی شریک تھے۔
فیڈرل بی انڈسٹریل ایریا پولیس کی بروقت کارروائی، اسٹریٹ کرائم میں ملوث دو ملزمان گرفتار
ترجمان وزیراعلیٰ سندھ کے مطابق، ملاقات کے دوران سندھ میں اٹالین زبان کی تدریس پر اتفاق کیا گیا۔ وزیراعلیٰ مراد علی شاہ نے اٹلی کے ساتھ ثقافتی اور تعلیمی تعلقات کو مزید فروغ دینے پر زور دیا اور کہا کہ سندھ اور اٹلی دونوں ثقافتی اعتبار سے بھرپور ہیں۔
اجلاس میں این ای ڈی یونیورسٹی اور اٹلی کی یونیورسٹی آف پدوا کے درمیان باہمی تعاون پر بھی بات چیت ہوئی۔ اٹلی کی سفیر ماریلیا ارمیلن نے بتایا کہ دونوں یونیورسٹیوں کے درمیان جلد ہی مفاہمتی یادداشت (ایم او یو) پر دستخط کیے جائیں گے۔
وزیراعلیٰ سندھ نے اٹلی کی کمپنیوں کو کراچی میں واٹر ٹریٹمنٹ پلانٹس لگانے کی دعوت دی اور کہا کہ اٹلی نے پاکستان میں بڑے ترقیاتی منصوبے کیے ہیں، جن میں تربیلا ڈیم کی تعمیر بھی شامل ہے۔ مزید برآں، سندھ انویسٹمنٹ ڈپارٹمنٹ اٹلی کی فرمز کے ساتھ قونصل جنرل کے ذریعے رابطہ کرے گا تاکہ مزید اقتصادی تعاون کو فروغ دیا جا سکے۔
یہ ملاقات سندھ اور اٹلی کے درمیان تعلقات کو مزید مضبوط بنانے کی جانب ایک اہم قدم قرار دی جا رہی ہے۔