تشکر نیوز: پنجاب حکومت نے یوم آزادی کے موقع پر ایک اہم اقدام کا اعلان کیا ہے جس کے تحت سولر پینلز کی تقسیم شروع کی جائے گی۔ اس منصوبے کا مقصد عوام کو بجلی بلوں میں ریلیف فراہم کرنا اور ملک میں قابل تجدید توانائی کے استعمال کو فروغ دینا ہے۔
وزیراعلیٰ پنجاب مریم نواز نے بتایا کہ 200 یونٹ تک بجلی استعمال کرنے والے صارفین کو 14 اگست سے مفت سولر پینلز فراہم کیے جائیں گے۔ جبکہ 201 سے 500 یونٹ تک بجلی استعمال کرنے والے صارفین کو سولر پینلز دس فیصد معاوضے کی ادائیگی پر دستیاب ہوں گے، جس کی 90 فیصد رقم پنجاب حکومت ادا کرے گی۔
سابق ہاکی اولمپئین بجلی کے بلوں، مالی مشکلات کے سبب گردہ بیچنے پر مجبور
سولر پینلز کی فراہمی بینکوں کے ذریعے ہوگی تاکہ اس عمل کو شفاف اور منظم طریقے سے انجام دیا جاسکے۔ وزیراعلیٰ پنجاب مریم نواز کا کہنا ہے کہ اس اقدام سے نہ صرف عوام کو ریلیف ملے گا بلکہ بجلی کے بلوں میں 40 فیصد تک کمی بھی آئے گی۔ انہوں نے کہا کہ ہمارا مشن عوام کو سہولت فراہم کرنا ہے اور ہم مشکل حالات میں بھی عوام کے ساتھ کھڑے ہیں اور رہیں گے۔
اس منصوبے کا مقصد نہ صرف بجلی کی بڑھتی ہوئی قیمتوں سے نمٹنا ہے بلکہ ملک میں توانائی کے بحران کو کم کرنے کے لیے بھی ایک اہم قدم ہے۔ سولر پینلز کے ذریعے بجلی پیدا کرنا نہ صرف ماحول دوست ہے بلکہ اس سے بجلی کے بلوں میں بھی نمایاں کمی آتی ہے۔
پنجاب حکومت کے اس اقدام کو عوام نے بھی سراہا ہے اور امید ظاہر کی ہے کہ یہ منصوبہ ان کی معاشی مشکلات کو کم کرنے میں مددگار ثابت ہوگا۔ یوم آزادی پر یہ تحفہ عوام کے لیے ایک خوش آئند خبر ہے اور اس سے ملک میں قابل تجدید توانائی کے استعمال کو فروغ ملے گا۔