خیبر پختونخوا میں سیکیورٹی فورسز نے دو الگ انٹیلی جنس بیسڈ آپریشنز کے دوران چار دہشت گردوں کو ہلاک کر دیا۔
خرم دستگیر کا ہنزہ جلسے میں پیپلزپارٹی پر وار
آئی ایس پی آر کے مطابق ضلع ڈیرہ اسماعیل خان میں 3 اور 4 جون کی درمیانی شب خوارج کی موجودگی کی اطلاع پر کارروائی کی گئی۔ سیکیورٹی فورسز نے مؤثر انداز میں دہشت گردوں کے ٹھکانے کو نشانہ بنایا، جس کے نتیجے میں شدید فائرنگ کے تبادلے کے بعد دو دہشت گرد ہلاک ہوئے۔
ایک اور انٹیلی جنس بیسڈ آپریشن ضلع مہمند میں کیا گیا، جہاں مزید دو دہشت گردوں کو ہلاک کیا گیا۔ آئی ایس پی آر کے مطابق ہلاک دہشت گرد بھارتی سرپرستی میں سرگرم تنظیم “فتنہ الخوارج” سے تعلق رکھتے تھے اور متعدد دہشت گرد کارروائیوں میں ملوث رہے ہیں۔
کارروائیوں کے دوران دہشت گردوں کے قبضے سے اسلحہ اور گولہ بارود بھی برآمد کیا گیا۔ علاقے میں ممکنہ دیگر دہشت گردوں کی موجودگی کے پیش نظر کلیئرنس اور سرچ آپریشن جاری ہے۔
وزیراعظم شہباز شریف نے کامیاب آپریشنز پر سیکیورٹی فورسز کو خراجِ تحسین پیش کرتے ہوئے کہا کہ دہشت گردی کے مکمل خاتمے تک کارروائیاں جاری رہیں گی۔
انہوں نے کہا کہ پاکستان کے امن، استحکام اور سلامتی کے خلاف ہر سازش ناکام بنائی جائے گی اور قوم اپنی مسلح افواج کے ساتھ کھڑی ہے۔
