عالمی یوم ماحولیات کے موقع پر پاک بحریہ کے سربراہ ایڈمرل نوید اشرف نے قوم کے نام اپنے پیغام میں موسمیاتی تبدیلی کو دنیا کو درپیش سنگین چیلنجز میں سے ایک قرار دیتے ہوئے ماحول کے تحفظ اور پائیدار ترقی کے لیے اجتماعی اقدامات پر زور دیا ہے۔
سندھ میں میٹرک اور انٹر نتائج کی تاریخیں جاری
انہوں نے کہا کہ ہر سال 5 جون کو منایا جانے والا عالمی یوم ماحولیات ماحول کے تحفظ، بقا اور ماحولیاتی شعور کے فروغ کے لیے عالمی سطح پر ایک اہم موقع فراہم کرتا ہے۔ اس سال کا موضوع "موسمیاتی تبدیلی کے تدارک کے لیے عالمی پکار” ہے، جو دنیا بھر میں بڑھتے ہوئے ماحولیاتی خطرات کی جانب توجہ دلاتا ہے۔
نیول چیف نے کہا کہ بڑھتا ہوا درجہ حرارت، سمندر کی سطح میں اضافہ، گلیشیئرز کا پگھلاؤ، شدید سیلاب، خشک سالی اور غیر معمولی موسمی حالات لاکھوں افراد کی زندگیوں اور ماحولیاتی نظام کو متاثر کر رہے ہیں، جس کے باعث فوری اور مربوط اقدامات ناگزیر ہو چکے ہیں۔
انہوں نے کہا کہ ماحولیاتی تحفظ اب صرف ایک ماحولیاتی مسئلہ نہیں بلکہ معاشی استحکام، خوراک کے تحفظ، انسانی صحت اور پائیدار ترقی سے بھی براہ راست جڑا ہوا ہے۔ اس لیے حکومتوں، اداروں، صنعتوں اور معاشروں کو مشترکہ طور پر مؤثر اور جدید حل تلاش کرنا ہوں گے۔
ایڈمرل نوید اشرف نے نشاندہی کی کہ مختلف عالمی اداروں کی درجہ بندی کے مطابق پاکستان موسمیاتی تبدیلی سے شدید متاثر ہونے والے ممالک میں شامل ہے۔ ملک کو ساحلی کٹاؤ، پانی کی قلت، آلودگی، شدید گرمی، خشک سالی اور تباہ کن سیلاب جیسے چیلنجز کا سامنا ہے۔
انہوں نے کہا کہ پاکستان نیوی قومی سطح پر ماحولیاتی تحفظ اور موسمیاتی استحکام کے لیے جاری کوششوں میں بھرپور کردار ادا کر رہی ہے۔ بحری ماحول کے تحفظ، ساحلی علاقوں کی صفائی، ماحولیاتی آگاہی مہمات اور عوامی شمولیت کے مختلف پروگراموں کے ذریعے بحری آلودگی میں کمی اور حیاتیاتی تنوع کے تحفظ کے لیے اقدامات کیے جا رہے ہیں۔
نیول چیف کے مطابق پاکستان نیوی ساحلی علاقوں میں مینگرووز کے جنگلات کے تحفظ اور بحالی پر خصوصی توجہ دے رہی ہے۔ مینگرووز ساحلی آبادی کو کٹاؤ اور شدید موسمی اثرات سے محفوظ رکھنے، سمندری حیات کے تحفظ اور کاربن کے اخراج کو جذب کرنے میں اہم کردار ادا کرتے ہیں۔
انہوں نے شہریوں، اداروں اور تمام متعلقہ فریقوں سے اپیل کی کہ وہ ماحول دوست طرز زندگی اپنائیں، پلاسٹک آلودگی میں کمی، توانائی کے مؤثر استعمال اور قدرتی وسائل کے تحفظ کے لیے اپنا کردار ادا کریں تاکہ آنے والی نسلوں کے لیے ایک سرسبز، پائیدار اور خوشحال پاکستان کی بنیاد رکھی جا سکے۔
