کراچی: کراچی پریس کلب میں ہیوسٹن کراچی سسٹر سٹی ایسوسی ایشن (HKSCA) کے صدر محمد سعید شیخ کے اعزاز میں پروقار عشائیہ تقریب منعقد کی گئی، جس میں صحافیوں، سماجی و کاروباری شخصیات، سول سوسائٹی کے نمائندوں اور مختلف شعبہ ہائے زندگی سے تعلق رکھنے والے افراد نے بڑی تعداد میں شرکت کی۔
اے وی ایل سی کی کارروائی، شاہراہِ بھٹو سے چھینی گئی ٹیوٹا فورچیونر برآمد، ملزمان فرار
یہ تقریب محمد سعید شیخ کو حکومتِ پاکستان کی جانب سے ستارۂ خدمت کے اعزاز کے اعتراف میں منعقد کی گئی۔ شرکاء نے ان کی عوامی خدمات، فلاحی سرگرمیوں اور پاکستان و امریکہ کے درمیان سماجی و ثقافتی روابط کے فروغ میں کردار کو بھرپور خراجِ تحسین پیش کیا۔
تقریب کے دوران کراچی پریس کلب کے صدر فاضل جمیلی اور سیکرٹری اسلم خان نے مہمانِ خصوصی محمد سعید شیخ کو سندھ کی ثقافت کی علامت اجرک اور سندھی ٹوپی کا تحفہ پیش کیا۔ اس موقع پر شرکاء نے اس اقدام کو ثقافتی روایات، محبت اور احترام کے اظہار کی خوبصورت مثال قرار دیا۔
اپنے خطاب میں محمد سعید شیخ نے کہا کہ یہ اعزاز انفرادی نہیں بلکہ ان تمام ساتھیوں اور رضاکاروں کا ہے جنہوں نے اجتماعی طور پر فلاحی اور سماجی خدمات میں ان کا ساتھ دیا۔ انہوں نے اس کامیابی کو اپنی ٹیم اور کمیونٹی کے نام کرتے ہوئے کہا کہ اجتماعی کاوشوں کے بغیر اس مقام تک پہنچنا ممکن نہیں تھا۔
مقررین نے کہا کہ محمد سعید شیخ نے بطور صدر HKSCA پاکستان اور امریکہ کے درمیان تعلقات مضبوط بنانے، کمیونٹی سروس کے فروغ اور اوورسیز پاکستانیوں کی مثبت نمائندگی میں نمایاں کردار ادا کیا ہے۔ ان کی خدمات کو بین الاقوامی سطح پر بھی قدر کی نگاہ سے دیکھا جاتا ہے۔
تقریب کے اختتام پر شرکاء نے محمد سعید شیخ کو اعزاز پر مبارکباد دی اور ان کے مستقبل کے لیے نیک خواہشات کا اظہار کیا۔ عشائیہ خوشگوار ماحول میں اختتام پذیر ہوا۔
